Inviterer seniorar til videomøte
Viss du er over 60 år gamal og har vondt for å koma deg ut, har Grannehjelpa, Kvam herad og Kvam folkebibliotek eit digitalt tilbod som kan vera noko for deg.
Desse har sidan mai jobba med prosjektet Fellesskap for framtida, som har som mål å få fleire seniorar som bur i Kvam til å verta meir aktive gjennom å ta del i sosiale fellesskapar på den digitale møteplattforma Whereby. Tilbodet vil vera eit supplement til fysiske møte. Føremålet er å førebyggja og motverka einsemd.
Det kjem fram i ei prosjektskildring frå Grannehjelpa.
Døme på tema som kan verta tekne opp i dei digitale møta, er slektsgransking, stadnamn i Kvam, turmoglegheiter, forfattarbesøk, litteraturstunder og lesesirkel med meir. Eit tematreff kan til dømes starta med eit føredrag, og så kan ein opna for debatt etterpå.
Ein kan òg halda kviss, trening, bingo, strikketreff eller knutekurs.
Det finst mange gode potensielle partar i Kvam som kan bidra med innhald, til dømes Hardanger fartøyvernsenter, Kunsthuset Kabuso, Kvam Senioruniversitet, biblioteket eller Folkeuniversitetet.
For å gjera deltakarane trygge på teknologien, vil ein sørgja for god teknisk støtte i forkant og undervegs.
Det digitale møterommet vil vera aktivt ein gong i veka frå torsdag 15. oktober.
Torsdag 22. oktober skal professor ved Universitetet i Bergen snakka om søvn og søvnvanskar.
