– Ikkje berre berre

Å sleppa den fyrste artisten er utruleg kjekt, synest festivalsjef Ida Sørheim. Då føler gjengen bak festivalen at dei er litt i gang med neste års arrangement. Ekstra kjekt var det å få Dagny på lista over artistar, fortel ho. Det har nemleg bookinggruppa jobba lenge med.

– Ikkje alle er spikra

Dagny Norvoll Sandvik vart fyrst kjend for låten «Backbeat», som ho sleppte hausten 2015. Våren og sommaren 2024 skal ho turnera. Mellom anna London, Paris, Berlin og København står på planen. Ja – og Norheimsund.

Tromsøværingen skulle eigentleg ha spela på festivalen i 2020, som vart avlyst. Dei fleste artistane vart flytta til festivalen året etter, men det passa ikkje for henne. Heller ikkje dei fyrste åra etter fekk Bygdalarm og popartisten det til å klaffa.

Det er mykje å ta omsyn til og eit stort arbeid, seier Sørheim. Festivalgjengen er glad for at det passa denne gongen. Dagny har etter kvart vorte ein stor artist, seier ho.

Kor mange av neste års artistar som allereie er tinga til festivalen, vil ikkje festivalsjefen røpa. Ikkje alle er spikra. Folk får fylgja med, er beskjeden. Fleire artistslepp kjem i adventstida.

Manglar lokale

Like før årets festival måtte den eine klubben flyttast frå Meieritomta. Alternativet vart den gamle brannstasjonen i bygda. Å ha klubben der vart ein stor suksess, ifylgje Sørheim. No er bygget historie.

Eit nytt lokale er enno ikkje på plass. Om nokon har eigna lokale i sentrum, tek festivalstyret gjerne imot tips. For sjølv om folk flest gjerne ikkje tenkjer så mykje på sommar og festivalliv på denne tida, er det liv i kulissane til festivalen heile året. Neste helg skal festivalen arrangera julemarknad.

Så ligg det nokre planar om moglege andre arrangement i lufta, fortel Sørheim. Men nett kva planar, er litt tidleg å seia, meiner ho.