I haust får born og unge sponsa aktivitetar

HF har tidlegare skrive om fritidskortordninga, prøveprosjektet som Kvam og 11 andre kommunar får ta del i. Alle born mellom 6 og 18 år får 900 kroner i halvåret frå staten til å dekka medlemsavgift for faste, organiserte fritidsaktivitetar. Utstyr og deltaking i einskildarrangement vert ikkje dekt.

Ordninga startar 1. august og varar i eitt år.

Kriteria er som følger:

• For at ein aktivitet skal kvalifisera, må det vera minst åtte treningar, øvingar eller samlingar i halvåret.

• Barnet som bruker pengane, må vera folkeregistrert i Kvam, men organisasjonen det deltek i, treng ikkje vera det.

• Organisasjonen må tilby prøveperiode.

• Trenarar og aktivitetsleiarar må ha gyldig politiattest.

• Medlemskostnadene bør ikkje auka meir enn normal prisvekst.

For å nytta fritidskortet, går ungdommane eller foreldra inn på nettstaden Friskus. Her må lag og organisasjonar registrera aktivitetane sine, og ungdommar eller foreldre betalar kontingenten via plattforma. Der kan ein òg betala restbeløp med bankkort. Innlogging skjer med Bank-ID.

Pengane kan brukast hos fleire organisasjonar.

Nedgåande trend

– Målet er at alle born og unge skal ta kortet i bruk. Ikkje alle er med på fritidsaktivitetar i dag. Me får ikkje henta ut pengane frå kort som ikkje vert brukte, seier kulturkonsulent Mary Ann Sørheim.

Ho vonar mange vil oppdaga nye aktivitetar å driva med, og at tilboda som finst, vil verta meir synlege.

– Trenden er at mange lag har nedadgåande deltaking. Dette er eit godt høve til å marknadsføra seg og få nye medlemer, seier ho.

Reidun Braut Kjosås, rådgivar for folkehelse, idrett og friluftsliv i Kvam herad, seier at born mellom 6 og 12 år deltek i stor grad og prøver ulike aktivitetar. Frå ungdomsskulen av byrjar mange falla frå.

No får lag og organisasjonar høve til å tenka nytt om rekruttering og å halda på medlemmer, seier Kjosås. Dessutan er det viktig for unge å møtast, vera sosiale og kjenna at ein høyrer til.

– Det er få ulemper med dette, seier ho.

Sørheim seier at heradet ikkje ynskjer at lag og organisasjonar nyttar høvet til å auka medlemsavgifta utover normal prisvekst. Ein kan ikkje nekta det, og det vert ikkje kontrollert. Det vert ei tillitssak, seier Sørheim, men ho påpeiker at det ikkje er garantert at den same stønaden vil komma neste år.

– Godt høve

Kristin Lundblad er tilsett i 50 prosent stilling som prosjektleiar. Ho byrjar i jobben 1. august, og skal stå til disposisjon for rådville foreldre og ungdommar, lag og organisasjonar. Når skulane opnar, vil ho reisa rundt på dei for å informera om tilbodet.

Lundblad synest fritidskortet er eit fantastisk tilbod, og ho opplever at det er lagt ned eit godt arbeid. Ho er spent på å sjå om stønaden fører til at nye tilbod blømer i Kvam.

– Dette er eit godt høve til å starta nye aktivitetar, seier ho.

Ordninga gjeld for 1.249 born og unge, og kring tre millionar kroner skal delast ut i Kvam i løpet av våren og hausten.

Effekten av pengebruken skal målast ved å samanlikna aktivitetsnivået før og etter, gjennom spørjeundersøkingar og intervju, og det skal gjerast ein samfunnsøkonomisk analyse av pilotprosjektet. Regjeringa bruker 45 millionar kroner på å testa fritidskortet.