Høgt og lågt i heilagt hus

Då HF kom inn i våpenhuset til kyrkja i Vikøy laurdag ettermiddag, var ei gruppe 3.-klassingar i gang med å granska det gamle, heilage bygget. Dei deltok på eit opplegg i regi av kyrkja, der alle fekk tittelen tårnagentar. Hovudoppgåvene deira var å finna ulike gøymde skattar.

Lyd som bar langt

Borna var delte i to grupper, der den eine var samla i kyrkjeskipet. Den andre hadde klatra opp dei bratte trappene til kyrkjetårnet. Midt i mørkeret stod kyrkjeverje Olav Skeie Lid. Han nytta mobilen som lommelykt og synte fram dei to kyrkjeklokkene til borna. Medan den eine kyrkjeklokka er frå om lag 1850, er den andre frå mellomalderen, fortalde han.

– Klokkene har ringt til sorg og glede i over 800 år. Når me ringjer i dei, kan lyden høyrast frå lang avstand, både til Norheimsund og Tørvikbygd, om vinden blæs rett veg, sa Lid.

– Heilt til Tørvikbygd? utbraut ein i gruppa.

– Ja, det stemmer. Dei fungerte mest som ein mobiltelefon før i tida, svara Lid.

– Oi! Då var han stor, sa ein annan.

Dei unge agentane lytta ivrig medan Lid fortalde historia om då den eine kyrkjeklokka knakk i to og måtte bytast ut, noko som er årsaka til at den eine klokka er mykje nyare enn den andre, forklara han.

Leita etter skattar

Heilt framme i kyrkja, ved altaret, løyste den andre gruppa gåter. Desse hinta om kvar dei kunne finna dei gøymde kyrkjeskattane. Saman fann dei ulike gjenstandar knytte til dåpen og nattverden.

Då sokneprest i Vikøy og Strandebarm, Vetle Karlsen Eide, synte fram begeret som vert nytta til nattverd, kom det fleire forslag om kva som bruka å vera oppi det.

– Vatn! kom det frå ein.

– Eller saft, kom det frå ein annan.

– Nei, det er dei greiene som gjer ein surrete i hovudet, sa ein tredje.

Det var tydeleg at borna allereie kunne litt om Jesus då Eide fortalde om det siste måltidet. Til dømes hadde dei god kontroll på at brødet og vinen symboliserer lekamen og blodet til Jesus.

Engasjementet blant borna vart etter lyden å døma størst då den siste gåta skulle løysast. Då skulle dei finna ei skattkiste. I henne var både ei bibelforteljing, fortald av kyrkjelydspedagog Solveig L. Sangolt, og godteri.

– Noko dei hugsar

Arrangementet er ein del av trusopplæringsplanen. Sangolt fortel at det overordna målet er å føra vidare den kristne trua og dei kristne verdiane. Dessutan er det viktig at borna har det moro, får gode opplevingar i kyrkja og kjenner at det er plass for dei der, legg ho til.

I løpet av det to timar lange opplegget utforska dei unge agentane, saman med tilsette i kyrkja og nokre elevar frå Framnes Kristne Vidaregåande Skule, langkyrkja som stod ferdig i 1838. Tanken bak skattejakta er at borna skal verta betre kjende med kyrkja. Alderen til Vikøy kyrkje gjer henne ekstra spesiell, meiner Sangolt.

– Ho er som eit museum. Her kan ein finna restar frå førre kyrkje, heilt tilbake til 1316. Denne kyrkja har så mykje historie i seg, seier kyrkjelydspedagogen.

Tårnagent vart for fyrste gong skipa til i 2014, ifylgje Sangolt. I år vert hendinga skipa til i kyrkjene i Ålvik, Øystese, Vikøy og Strandebarm. Sjølv om det i hovudsak er 3. trinn som vert invitert, er det vanleg å slå saman kull dersom elevane ikkje er så mange, seier kyrkjelydspedagogen.

– Korleis er responsen?

– Me har fått mange gode tilbakemeldingar. Me opplever at borna storkosar seg når dei er med, og dei gjev uttrykk for at dette er noko dei hugsar i ettertid.