Held stien sin rein

– Det veks til her, konstaterer Kaia Gulbrandsen i Herand Bygdelag.

Ho var ei av fire som fredag møtte fram til dugnad på Kulturstien i Herand. Stien går gjennom både arkeologiske funnstader og geologiske fenomen. Turar på stien har dei siste åra vorte ein meir populær aktivitet for både fastbuande og dei som vitjar bygda.

I år har stien vorte ein del av stolpejakta til Odda Orienteringslag, og mange skriv seg i turboka som ligg ved stien.

Historisk stad

Medan ryddelaget held på i løypa, passerer ein mann frå Nederland. Han og kona er på campingferie i Noreg, og vitja Herand den dagen.

– Det er ein fin tur, seier turisten.

Han er særleg glad for informasjonsskilta som står rundt om i løypa. Dei fortel om historia til Herand, som strekkjer seg ni tusen år tilbake. Skilta fortel om alt frå geologien i fjellsidene til bergkunst og båtbyggjartradisjonar.

– Ein får verkeleg eit inntrykk av at dette er ein historisk stad, seier Harald.

Ein av dei som var på dugnad, er Ole Christian Wold Haavik. Til dagleg bur han i Oslo, men han har hytte i Herand. Han er og administrator av facebookgruppa «Herand».

– Det er 200 som bur her, men 1.300 medlemer i gruppa. Det syner at det er mange som er knytte til bygda, seier Haavik.

Syner historia

På Herand Kulturhistoriske Senter – i dei tidlegare skulelokala – sit David Mathias Fiskerstrand. Han bur i Ulsteinvik på Sunnmøre, men har hytte i Herand. I sommar er ein av oppgåvene hans å betena senteret.

– Det har vore litt folk innom, seier Fiskerstrand.

På senteret kan han tilby utstillingar og videoframsyningar som opplyser om historia til Herand.

– Det er ein del fokus på båtbygginga, seier Fiskerstrand.

Sjølv om senteret er skilta og opplyst om, er det ikkje så mange utanlandske turistar som kjem innom. Dei dagane Fiskarstrand har vore der, har om lag ein firedel av dei kome frå andre land enn Noreg.

Prøver å promotera

Det er Herand Bygdelag som eig og har ansvaret for det kulturhistoriske senteret. Angunn Handegard Trå i bygdelaget seier at ein i år har fire ungdomar som ynskjer turistane velkomne kvar sine veker.

– Det er vinn-vinn. Me får nokon som ynskjer velkomne, og dei unge får ein inngang til arbeidslivet, seier Trå.

Bygdelaget prøver å promotera museet i sosiale medium og gjennom turistinformasjonen. Overnattingsstadene i nærleiken har fått informasjon om tilbodet.

I tillegg til å ha ope hus om sommaren, er senteret året rundt ope for grupper som ynskjer ein gaida tur. Til dømes var leirskulen i Jondal innom tidlegare i år.

Flest norske turistar er innom senteret. Noko av grunnen, trur Trå, er at det er mest nordmenn ein når med marknadsføring på internett. Eit anna problem for dei utanlandske turistane er at dei ikkje har tilgang til betalingstenesta Vipps.

– Me håpar å ha noko på plass til neste år, seier Trå.