Harding Puls rundar 30

Det går fram av ei pressemelding frå organisasjonen.

Laget, som er det einaste i sitt slag i Hardanger, skal feirast grundigare i mai 2024. Organisasjonen har 69 profesjonelle medlemer, og har stått i spissen for kulturell nyskaping og samarbeid i regionen sidan 1993.

Etter eiga utsegn har Harding Puls vore eit dynamisk kraftsentrum for kunstnarar i tre tiår, og har bygt bruer mellom tradisjonelle og moderne uttrykk. Organisasjonen har medverka til å forsterka kunstopplevingar i Hardanger ved å skapa eit mangfaldig og inkluderande kunstmiljø.

Harding Puls vart stifta på Utne ut frå eit ynske om å skapa ein fellesskap der kunstnarar kunne møtast, samarbeida og veksa, fortel styreleiar Inger-Kristine Riber i presseskrivet.

I dag er laget eit nettverk av kreative kunstnarar som kontinuerleg medverkar til å forma og fargeleggja det kulturelle landskapet i Hardanger, ifylgje henne.

Frå å publisera kunstnarkatalogar til å arrangera fellesprosjekt, har Harding Puls gjennom heile perioden arbeidd for å fremja kunst og kunstnarar i regionen. Innsatsen har medverka til å gjera Hardanger til eit attraktivt knutepunkt for kulturinteresserte frå heile verda, skriv Riber.

Medlemene i Harding Puls er bundne saman gjennom ei felles tilknyting til Hardanger, heiter det i pressemeldinga. Denne sambindinga skapar eit unikt samspel av lokal kunnskap og internasjonal utveksling, som igjen styrkjer både forumet og regionen dei representerer, skriv laget.

30-årsjubileet skal markerast skikkeleg 4.–26. mai i Kunsthuset Kabuso. Feiringa vil vera ein hyllest ikkje berre til medlemene, men også til samspelet og kreativiteten som Harding Puls har inspirert til gjennom åra, opplyser Riber.