Hardangerkunstnarar på skjermen

Ho er frå Odda, og bur på Voss.

– Elles hadde eg ikkje fått vore med i HP – det er svært eksklusivt –, for ein må anten vera frå eller bu i Hardanger, seier ho.

Prosjektet heiter Puls Profil, og fyrst ut til å verta skildra er musikar Eli Gauden frå Norheimsund.

– Ho var heilt fantastisk å jobba med. Det var veldig kjekt å laga den videoen, seier Jordal.

Prosjektet er eit ledd i ei digitalsatsing frå HP.

– Får betre kontakt

– Me håpar dette vil bidra til at me kjenner at me får litt meir kontakt, i ei tid då me bør halda fysisk avstand, seier Jordal.

Det kjem fem videoar no i haust, og vonleg fem til fram mot sommaren. Prosjektet er så langt støtta av koronafondet til Sparebankstiftinga Hardanger. Jordal både filmar og redigerer videoane for HP.

Neste ut er Felieke van der Leest. Ho bur i Øystese og kjem opphavleg frå Nederland. van der Leest er ei av dei nederlandske kunstnarane som flytta til Kvam for vel ti år sidan i samband med prosjektet Kvammalokk.

– Ho lagar veldig spesielle smykke, seier Jordal.

Viser fram kunstnarar

HP har fått pengar frå kommunane i Hardanger til å laga fem videoar i fyrste omgang.

– Målet er å få vist fram medlemene våre, kunstnarane, både for dei som vil bruka dei til noko og for oss sjølve. Så føler me at me ser litt til kvarandre. For no er det ei tid då me helst ikkje skal sjå kvarandre så mykje. Då er det fint å ha videoar, så du får ei kjensle av kven personen er, seier Jordal.

Videoane vil verta publiserte i fleire kanalar: Vimeo, Instagram, Facebook og nettsida til HP.

HP vil òg bruka videoane når dei søkjer om pengar frå til dømes Kulturrådet til å visa kva kunstnarane driv med.

Eit sosialt tiltak

– Det er noko heilt anna enn å berre skriva om det. Det vil koma fram kor ulike kunstnarane er, og kor mykje kompetanse som finst mellom medlemene våre. Me vil forvalta og visa fram kunnskapen på ein profesjonell måte, seier Jordal.

Videoane er til lobbybruk overfor potensielle bidragsytarar, men òg som eit nesten sosialt tiltak.

– Lista er lågare no for kva som er sosialt, konstaterer Jordal.

Målgruppa for HP er medlemene og publikum i Hardanger.

– Me er ein medlemsorganisasjon og ynskjer at medlemene våre skal få mest mogleg ut av å vera medlem i HP.

Eit levande kunstnarmiljø

Kunstnarane er òg opptekne av å nå ut til det generelle publikummet, til dømes folk som bur i Kvam, Ullensvang, Ulvik eller Granvin.

Jordal vil folk skal sjå at det finst levande kunstnarmiljø her – ein må ikkje til Bergen for å finna profesjonelle kunstnarar.

– Det er kjempehøgt nivå på dei kunstnarane som finst her, seier ho.

– Dei lagar kunst, musikk og litteratur som snakkar til oss. Det er ganske viktig at me synleggjer oss for folk flest. Eg håpar dei fleste har høyrt om HP, men eg er ikkje heilt sikker.

Jordal vil presentera eit breitt utval utøvarar, innan til dømes litteratur, musikk, biletkunst og kunsthandverk.