– Har tru på at kommunen tek tak
Viketunet har hatt over 650 gjester i sommar.
Tunet var ope frå 1. juli ti 15. august. På dei beste dagane hadde laget 70–80 gjester. Vaflar, lappar, kringler og kaker har gått som varmt kveitebrød, opplyser styreleiar Olaug Værland.
Eldhuset har vore i bruk til baking av krotekaker fem dagar, det har vore eit opplegg i regi av fem pensjonerte lærarar for 80 leirskuleelevar, og aktivitetslaget har samarbeidd med Hardangerakademiet om sommarleiren Ferie for alle.
Værland er del av eit nytt styre. Med seg har ho Nina Borgen, Svein Johan Bakke og Oddveig Vetlesand. Med seg på laget har dei kring tjue frivillige som stiller opp som vertar i tunet og på dugnad, fortel Værland. Dessutan stiller 35 støttelemer opp med økonomiske bidrag og heiarop, fortel ho.
Som HF har skrive før, har den førre styreleiaren etterlyst kommunal interesse for det kommunalt åtte tunet. Særleg har vedlikehald vore sakna. Etter eit møte 25. september med verksemdleiar for bibliotek og kultur, Else Marie Sandal, har aktivitetslaget tru på at kommunen vil ta tak i dei naudsynte oppgåvene. Tre dagar seinare møtte laget bygningsvernansvarleg Anne Lise Brask Eriksen i Hardanger og Voss museum. Viketunet er ikkje del av museet, men har avtale om konsulenthjelp, ifylgje Værland.
Verkstaden har høgast prioritet. Vøla må utførast av fagpersonar, og saka må handsamast politisk, fortel Værland. Elles er noko mindre vedlikehald sett i gang i sommar.
– Viketunet Aktivitetslag har hatt ein aktiv sesong heile sommaren. Me har opplevd at både fastbuande i Jondal og tilreisande har sett pris på dette. Målet vårt er at Viketunet skal vera eit levande museum der store og små kan få gode opplevingar i det fine tunet og få eit forhold til historia i bygda. For oss er det aktiviteten som har fokus. Bygningane er kommunen sitt ansvar, skriv Værland i ein e-post til HF.
