Har store planar for M/S «Epos»

Dette skriv stiftinga i ei pressemelding. Stiftinga overtok eigarskapen i båten ved nyttår etter å ha jobba for å få det til i eit halvt år.

– Dette gjev oss moglegheita til å utvikla båten vidare som flytande litteraturhus. No er det berre fantasien som set grenser for kva me kan finne på, seier dagleg leiar i stiftinga Maria Pile Svåsand.

Eigenkapitalen er komen inn gjennom folkefinansiering i Spleis, tilskot frå Sparebankstiftinga Hardanger og Vestenfjelske bykreditts stiftelse. Resten måtte lånast.

– Me tek ein sjanse når me låner pengar, men når me ser kor mange som ønskjer dette tilbodet, vel me å ta sjansen, seier Svåsand.

M/S «Epos» vart bygd av Fjellstrand AS for 60 år sidan. No er båten attende ved verftet. I vår skal den få nokre små oppgraderingar, før den legg ut på turné i samarbeid med biblioteka i Vestland fylke.

M/S «Epos» turnerte vestlandskysten frå 1963 til fylkeskommunen la ned tilbodet i 2020. Våren 2022 løyvde Fritt Ord 3 millionar til drifta og opprettinga av ei stifting som skal driva båten. Vestland fylkeskommune løyvde 300.000 frå kulturelt utviklingsfond til båten i 2023.

– Me håpar at Litteraturbåten skal vera eit spleiselag mellom kommunar og fylke, og at me kan få ein plass i statsbudsjettet – på lik line med litteraturhusa i dei store byane. M/S «Epos» er eit litteraturhustilbod til distrikta, og målgruppa vår er på om lag ein halv million menneske. Det er trass alt ein stor by i norsk målestokk, seier Svåsand.