Har hatt over tusen gjester så langt i år
Kåre Jørgen Underhaug i stiftinga Jondal Motormuseum har søkt Ullensvang kommune om fritak frå eigedomsskatten.
Han syner til eigedomsskattelova. Ho slår fast at kommunestyret kan frita for eigedomsskatt, heilt eller delvis, eigedom til stiftingar eller institusjonar som tek sikte på å gagna ein kommune, eit fylke eller staten.
Underhaug skriv at han synest det er urimeleg at museet skal måtta betala eigedomsskatt for ein attraksjon som han leverer til kommunen utan at det kostar sistnemnde ei krone eller noko anna bidrag.
Underhaug viser til at ordførar Roald Aga Haug nyleg skreiv i eit lesarinnlegg i HF at turisme og ringverknadene av denne er viktig for kommunen.
– Når dette er ei viktig sak for kommunen, så kan dei ikkje stengja ned ein attraksjon i Jondal som dreg turistar. Så langt i 2023 har me hatt over tusen gjester. Dei fleste stoppar etterpå i Jondal eller Odda for middag. Så dette bidreg andre stader òg, skriv Underhaug.
Søknaden er grunngjeven med at stiftinga er basert på «non-profit». Ho er ein ideell organisasjon som fremjar ålmennyttige føremål. Stiftinga driv arbeid som er til føremon for kommunen og innbyggjarane, heiter det i søknaden.
Stiftinga Jondal Motormuseum skal ifylgje vedtektene utvikla museet til eit nasjonalt motormuseum for å bevara køyretøyhistorisk materiale og gjera det tilgjengeleg for ålmenta.
Finansiering skal skje med inngangspengar, utleige, offentleg eller privat driftsstønad og andre føremålstenlege tiltak.
Museet er drive på frivillig basis. Underhaug søkte om fritak også i 2022, men fekk avslag.
