Har endeleg funne lokale til Jondal Motormuseum

På veggen heng eit gamalt bensinreklameskilt. I det eine hjørnet døser ein bil frå 1926 av merket International einsamt og ventar på selskap. I naborommet løyner ein tysk motorsykkel frå 1939 seg under eit laken. Den spede starten på det som kan verta ein ny attraksjon i Hardanger, er eit faktum.

Allereie i 2010 ytra far til Kåre Jørgen, John Arvid, eit ynske til Jondal kommune om å få kjøpa «Pilaverkstaden», ein tidlegare møbelverkstad i Jondal sentrum. Også «Hestabanen», eit steinkast frå verkstaden, har familien sett på som eit alternativ.

No, 12 år etter, har sonen omsider fått tak i industribygget som tidlegare har hyst Fredhaug Møbelfabrikk og seinare Folgefonn Design Senter.

— Eg høyrde rykte om at Folgefonn Gjestetun skulle selja, så eg ringde. Det stemte. Like etter fekk eg oversendt taksten, fortel Kåre Jørgen Underhaug.

No er Jondal Motormuseum registrert og har eigen logo. Håpet er å få opna dørene for gjester før sommaren. Motormuseet skal drivast på dugnad, og det er ikkje noko Underhaug ser for seg å tena pengar på. Får han dekt utgiftene til straumen, vil han vera nøgd. Slik prisane er no, kostar det rikeleg berre å ha lys ståande på.

Prisauke

Då John Arvid la inn bod på eigedomen for 12 år sidan, var salsverdien 800.000 kroner. Taksten i fjor var 1.950.000 kroner.

— Eg synest det er dyrt, men ser ein på bustadprisar generelt, har dei auka meir enn eg hadde trudd. Det er heller ikkje ein forrykande pris med tanke på storleiken på bygget, seier Kåre Jørgen Underhaug.

Det var eit par andre interessentar, men ingen som tilbaud takst eller meir. Motorentusiasten overtok bygget 5. september. Det hadde det ikkje vore gjort noko særleg med bygget dei siste åra.

— Ute har det nok aldri sett så fælt ut som i sommar. Innvendig såg det likt ut som alltid. Då eg overtok formelt, hadde eg allereie spylt ned og måla det meste utvendig, fortel Kåre Jørgen.

Utstilling

Veteranbilsamlaren ser føre seg ein utstillingshall med bilar, men gjerne også med andre motorrelaterte gjenstandar. Utstyr til hest og slåmaskiner, til dømes. Han lyt rett og slett sjå kva han får plass til, og vil gjerne sjå på det om folk har noko ståande. På veggene ser han føre seg eksempelvis gamle bilete.

Dei fleste vindaugo er bytte. Murvegger er pussa, og innvendig i den største hallen er alt måla. Det har teke lang tid berre å rydda ut og kasta mykje av det som var i bygget. Framleis står ein del att.

— Me fekk teke det mest naudsynte før vinteren. I den delen som er av tre, har me bytt litt kledning og noko reisverk. Det var litt ròte, seier Kåre Jørgen.

Nyleg viste det seg at taket lek og at fukt kjem inn. Det var eit steg tilbake, men framover skal han.

— Så det lyt me gjera no i vår — byta taket.

— Kor mykje pengar brukar du på dette?

— Eg vil tru det har gått mellom 100.000 og 150.000 kroner i vøle allereie. Så tippar eg at det går rundt 200.000 kroner til, fortel Underhaug.

Håpar på fritak

«Museumsdirektøren» har søkt Ullensvang kommune om fritak frå eigedomsskatt for eigedomen. Fleire typar eigedomar kan få skattefritak, til dømes dersom dei er til gagn for ålmenta, men eit vilkår er at dei er eigde av stiftingar eller institusjonar.

Rådmannen tilrår kommunestyret å gje avslag på søknaden i møtet 1. februar, sjølv om han meiner det ser ut til at bruken av eigedomen i seg sjølv kvalifiserer for fritak. Grunngjevinga hans er at eigedomen er ått av Underhaug personleg, ikkje av organisasjonen Jondal Motormuseum.