Gudstenestene står opp att sundag
Kyrkjene kan opna for verksemd att frå 10. mai, etter at bransjestandarden no er klar.
– Me skal prøva oss med gudsteneste sundag i Norheimsund, seier kyrkjeverje Hans Soldal.
Maksimalt 50 får delta. I praksis vert det 46 eller 47, for kyrkja må telja med dei tilsette. Kyrkjeverja vil stå i døra og telja gjestene. Nummer 51 vil måtta snu. Det ansvaret har kyrkjeverja.
Det vert ei litt enklare gudsteneste.
– Me har fått ganske mange spørsmål frå kyrkjelyden om det snart vil verta halde nattverd. Det vil det verta sundag. Det vert gjort etter smitterettleiaren, seier Soldal.
Det vert berre den som tek imot som kjem i kontakt med oblaten og begeret til vinen. Kyrkja har diskutert dette med kommunelegen.
– Det vil verta brukt det som me kallar særkalkar, seier Soldal, som prøver å få tak i eingongsbeger.
– Me legg på førehand oblaten opp i begeret, og brukar hanskar. Så blir det den som skal ta imot nattverden som må ta opp oblaten og deretter få vin i begeret.
Grensa på 50 personar gjeld også for gravferder, der ein i praksis kan ha 45 gjester.
Elles gjeld mellom anna regelen om å halda ein meters avstand, som det har vorte terpa på, og god handhygiene.
– Det kjem me til å retta oss etter. Me kjem òg til å merkja benkene som ikkje kan brukast, seier kyrkjeverja.
Til allsongen vil det vera brukt prosjektor, ikkje salmebøker. Det òg er eit råd frå sentralt hald. Alle kyrkjetenarane har fått opplæring i koronatiltak, opplyser kyrkjeverja.
Konfirmasjonane vert framleis planlagde i september.
– Me veit ingenting om de. Det kan henda at me då framleis har 50 personar som grense. Då må me ta omsyn til det og dela opp i fleire konfirmasjonsgudstenester etter kvarandre. Det kan òg vera at me får løyve til å samla 200 personar når me kjem så langt ut på året, seier Soldal.
