Gav full støtte til Fosse-tun i Strandebarm

Saka vart teken opp som ekstrasak i heradsstyremøtet 1. februar. Debatten baud på meiningsytringar, men ikkje av det kontroversielle slaget. I staden gjekk folkevalde i tur og orden på talarstolen for å strø sand på framlegget på ordføraren og rosa han for å vera snøgg i snuen.

Vedtaket om støtte slår fast at senteret «skal liggja i Strandebarm», og at heradet ser positivt på den gamle skuletomta som eit eigna alternativ.

– Sjølvsagt må det vera i Strandebarm. Det er Fosse sitt landskap, sa Geir Madsen (SV).

Ordførar Torgeir Næss (Ap) påpeika at det kan tenkjast at nokon vil meina at senteret bør liggja ein annan stad i Strandebarm, men at han trur det er svært lite truleg.

– Det er uheldig å vera kategorisk så lenge det er teoretisk mogeleg at departementet kan meina noko anna, sa han.

– Tunet vil bety mykje for Strandebarm, Kvam, Vestland og Noreg med omsyn til framvising av forfattarskapen til Jon Fosse både nasjonalt og internasjonalt, og kan få mange positive ringverknader, heiter det i vedtaket.

Dagen før møtte ordføraren kultur- og likestillingsminister Lubna Jaffery (Ap), som oppmoda om å gjera lokale støttevedtak.