Fyller fjorden med tonar
I år som i fjor vert det invitert til «Fjordatonar» i fleirbrukshallen i Jondal.
Ideen som vart sett i verk i fjor, ser med andre ord ut til å verta tradisjon. Fyrstkomande laurdag samlast seks musikklag til musikkfestival og konsert. Dei som stiller, er Herand Musikklag, Odda Storband, Nå Musikklag, Odda Musikklag, Hardanger Big Band og Hardangerbrua Musikklag.
Angunn Handegard Traa i Hardanger Big Band seier arrangementet stort sett vert i same stilen som i fjor. Tilbakemeldingane tilsa at det var ein god måte å gjennomføra konserten på, fortel ho. Musikklaga får litt kortare speletid, men så skjer det også litt meir mellom konsertane. Stuntpoet Arne Torget frå Kvinnherad stiller opp som konferansier.
Arrangørane bak – Herand Musikklag og Hardanger Big Band – har funne ein god samarbeidsform, synest Traa. Med felles dirigent og fleire felles musikantar fell det naturleg. Sjølv har Traa rolla som rekneskapsansvarleg.
– Nokre er flinke til å baka, andre er flinke med tal. Eg er i sistnemnde kategori, seier ho.
– Har det vorte meir samarbeid mellom musikklaga etter i fjor?
– Eg veit i alle fall at frø er sådde til vidare samarbeid. Ullensvang Skulemusikklag, som diverre ikkje kunne vera med i år, fyller 100 år neste år, og har allereie planlagt ei kjempehelg i Fjordahallen i Kinsarvik, seier Traa.
Invitasjonar skal vera sende, også til kor i området.
– Kva ser du mest fram til med årets «Fjordatonar»?
– Å spela saman med andre, å gle andre med musikk og å dela interesse med andre likesinna. Me vert inspirerte av kvarandre. Det er fint å utveksla erfaringar og problemstillingar, seier Traa.
