Franske koristar vitja Jondal
Tysdag kveld strøymde det harmoniske tonar frå kyrkja i Jondal. Eit barnekor frå Frankrike er på noregsturnè og tok turen innom bygda.
Koret «Les petits chanteurs de Saint-André» kjem frå den franske byen Colmar. 64 songarar i alderen 7–18 år er med på noregsturen. Programmet er variert og inneheld både gospel og songar i barokkstil. Om lag 50 publikummarar fekk oppleva framføringa i Jondal.
– Koret imponerte med flott klang, formidling og lagmoral. Alle kunne alt utanåt, fortel Anne Karin Stormyr.
Ho er kantor i Jondal kyrkje. Saman med soknet og barnekoret Solstråla tok ho imot dei franske ungdommane då dei kom til bygda.
– Eg hadde ikkje høyrt om koret før. Det er kjekt at dei ville koma til oss, seier Stormyr.
Koret hadde sendt ein førespurnad om å få spela konsert i ulike kyrkjer rundt Voss. Dei var hjarteleg velkomne til Jondal.
Jondal og Utne sokn sin nye fungerande sokneprest, Arne Opsahl-Engen, takka koret etter konserten og ynskte songarane eit godt opphald vidare på Vestlandet.
Koret vart starta i 1987 og har sunge i 24 ulike land sidan då. Tidlegare har det vitja Lofoten og Nordkapp.
