Framnesruss med rytmiske rørsler

Laurdag hadde tredjeklassingane ved Framnes Kristne Vidaregåande Skule premiere på årets russerevy, som fann stad i Framnes Arena. Framsyninga lokka fram latteren hjå eit engasjert publikum i salen. Storparten av dei frammøtte var foreldre frå ulike kantar av landet, som tidlegare på dagen hadde delteke på ein «foreldredag».

I framsyninga vart karakteren «Sofie», spela av Olianna Johansson, dregen mellom to ulike miljø — Framnes sitt kristne, konservative miljø og bygdefolket som dansa swing på fest. Dei to andre hovudpersonane, spela av Håvard Skjælaaen Dahl og Isak Desaleng, vart fanga i eit såkalla «trekantdrama», der dei båe ville ha «Sofie».

Ein av de som verkeleg levde seg inn i karakteren, var Erlend Sandven. Han spela rolla som «fisefine Marthe» og vart teken godt imot av publikum. Sandven fekk fleire gode tilbakemeldingar for det han presterte på scenen.

Bandet, som bestod av Lars Hetlesæter på piano, song og gitar, Ingmar Lid på synthesizer, Andreas Kaslegard på gitar, Gaute Øymo Mælen på bass og Andreas Mulen på trommer, sette på mange måtar sjølve «prikken over i-en».

Parodieringa av lærarar var det som slo best an hjå elevane blant publikum. Dei fortalde at dei ikkje var i tvil om kven det var som vart etterlikna.

Dansen spela ei viktig rolle i årets russerevy. Før framsyningane i helga hadde russen halde swingkurs og øvt på teknikken.

Julie Joranger, ei av dei fire revyansvarlege, er utruleg stolt over innsatsen til kullet og all jobben som er lagd ned. Ifølgje henne ligg det mykje planlegging og arbeid bak dei 50 ulike innslaga som vart viste. Joranger tykkjer at det har vore ein svært morosam jobb. Resultatet gjorde henne rett og slett mållaus.

Framsyninga laurdag vart runda av med ein premierefest med pizza i peisestova. Gaute Øymo Mælen kunne melda om både god stemning og god musikk. Så var det «på'n igjen» dagen etter.