Framleis filmglede

Sjølv om sofaene får vera i fred, er det framleis kino ein gong i månaden. Då vert to filmar – ein familiefilm og ein vaksenfilm – viste. Utvalet kjem an på kva filmar som er aktuelle og kva folk viser interesse for.

Får velja

Bygdekinoen, som står for utstyr og sjølve filmframsyninga, tilbyr fleire filmar å velja mellom. Og Strandebarm Ungdomslag, som står for det praktiske og driv kiosken i forsamlingshuset, kan ynskja seg filmar så lenge laget spør i god tid, fortel Siv Håbrekke. Ho har stått på for kinotilbodet i ei årrekkje.

Ungdomslaget har både eige lerret og lydanlegg i huset, men resten ordnar Bygdekinoen med litt hjelp av dei som steller i stand kiosken.

Kva kino det kjem flest på av familie- og vaksenfilmane, spørst heilt på kva filmar som vert viste. Det kan vere nesten ingen på familiefilmen den eine gongen, men 70 stykk neste gong for å sjå til dømes «Sauen Shaun», seier Håbrekke.

– Ein pust i kvardagen

Det har vore mange med på kino før, men det er ikkje like mange som kjem på kino no lenger, seier ho. Ho seier ungdomslaget merka nedgangen etter at laget slutta med sofaene, men at det ikkje treng vera den einaste grunnen. Endra tidspunkt kan ha hatt litt å seia. I tillegg er det vorte dyrare å gå på kino enn før. Koronapandemien kan òg ha påverka tala. Håbrekke vel likevel å tru at det ikkje er slik at folk ikkje har lyst til å gå på kino lenger.

Kinoen har eigen kiosk med skikkeleg popkorn. Alle foreldre som tek med seg borna, får ein vel unnt kaffikopp i kiosken.

– Ein pust i kvardagen, seier Håbrekke.

Ikkje alt er lett

Ei utfordring er at det er vanskeleg å få tak i vikarar. Det er såleis gjerne dei same som driv kinoen kvar gong. Når nokon ikkje har tid, kan det verta problem.

Det kan òg vera vanskeleg å halda temperaturen oppe i det gamle huset. Viss temperaturen søkk veldig fort og vinden står på, kan det ein sjeldan gong vera vanskeleg å halda kinolokalet særleg varmt, seier Håbrekke.

Ho opplyser at det ikkje nett er ei blømande pengemaskin å driva kino. Til alt hell, understrekar Håbrekke med takksemd, stiller Kvam herad opp som underskotsgarantist.

Krig lokkar

Då HF var innom kinoen 23. september, stod «Quislings siste dager» på programmet for dei vaksne. 14 fekk med seg filmen. I år har filmane for vaksne, ikkje minst krigsfilmar, vore mest populære. 18. november kjem «Nr. 24», som Håbrekke reknar med vil trekkja ein del folk. Aller mest populær dette året var «Ibelin», som handlar om gamaren Mads «Ibelin» Steen.

Eit anna poeng om ein skal trekkja folk, er at filmen er ny og ikkje har vore vist andre stader ei stund når han kjem til Strandebarm, fortel Håbrekke. Ho er takksam for alle som kjem. Det er trass alt bruken som bestemmer om folk kan ha kino, spesielt på ein liten stad som Strandebarm, påpeikar ho.

Neste høve til å bruka tilbodet kjem måndag 21. oktober. Då vert «Snørra og Snerken – Mysteriet med de forsvunne hullene» og «Elskling» synte i Haugatun.