Frå husmannsplass til kulturarena
Han ante nok ikkje kva etterkomarane skulle få til, husmannen som etablerte Kvemmadokkje i Ulvik.
Torkjell Lunde Børsheim og Heidi Lund Berg driv i dag garden Børsheim. Her er kulturarenaen Kvemmadokkje ein del av drifta på garden, skriv dei to i ei pressemelding.
Kvemmingen Johannes Arnesen frå Ytre Ålvik busette seg her på 1800-talet og kan tilskrivast æra for stadnamnet. Dokkje tyder at staden ligg i eit søkk i terrenget. Husmannsplassen har vorte restaurert og utvikla dei siste 25 åra.
Frå 2007 har det her vorte skipa til fleire store utandørskonsertar og kulturarrangement. Laurdag 16. juli vert det arrangert Husmannsstovefest i Kvemmadokkje. Det er ei årviss tilskiping der ein ynskjer å tilby kultur på høgt nivå. Kvitanesen – Torbjørn Ljones – skal kåsera, og Stein Torleif Bjella skal opptre med song og spel.
Den musikalske framsyninga Husmann, som vart spesialskriven til Kvemmadokkje i 2019, vert sett opp att. Ho er inspirert av historier frå husmannslivet i Hardanger.
Manuset er skrive av den prislønte forfattaren Ruth Lillegraven frå Granvin, og musikken er laga og vert framført av duoen Rannveig Djønne og Annlaug Børsheim. Dei opptrer med toradar, fele, song og gitar. Som skodespelarar har dei fått med seg vossingen Morten Svartveit, Kjærsti Odden Skjeldal frå Fredrikstad og folkedansar og ulvikje Torkjell Lunde Børsheim.
