Frå heimelaga sirkus til Spellemannprisen

Medlemene i duoen Naboen min har alltid vore interesserte i musikk. Heilt frå dei var små, har dei som naboar funne på mykje kreativt, mellom anna laga både sirkus og band. Då tenkte dei nok ikkje at dei skulle reise rundt på turné hausten 2019 og spela nesten 50 konsertar på 3,5 veker.

Rockesokk

Men korleis begynte det heile? Då må me fleire år tilbake. Då Vegard var lærar i ein andreklasse, kom det eit rockeband på besøk til skulen. Vegard merka då at elevane vart gira av musikken. Han bestemte seg då for å gjera noko av det same. Han reiste heim og laga songen Rockesokk same ettermiddag, og spela songen for klassen sin dagen etter. Songen vart svært godt motteken av elevane.Rockesokk handlar om at det kan vera vanskeleg å sitja i ro. Dette illustrerte elevar frå Norheimsund barneskule godt i musikkvideoen som kom ut tidlegare i år.Songane på albumet Rockesokk har vorte til i løpet av dei siste åtte–ni åra. Men det var ikkje før i fjor at songane vart samla og spela inn, og då er det berre kvemmingar som er med og korar og på video, fortel Vegard stolt.

Året som gjekk

Naboen min har hatt stor suksess det siste året. Vegard skildrar dette året som kjekt, overraskande og hektisk. Dei har halde mange konsertar og altså vore på turné, der dei hadde nesten 50 konsertar på 3,5 veker. Men det aller største som har hendt for Naboen Min dette året, er at duoen vann Spellemannprisen.– Det var heilt utruleg kjekt! Spellemannprisen var berre noko me hadde høyrt om og sett på tv, seier Vegard. – Me sat faktisk og såg på Spellemannprisen året før, og så sa eg: «Ja ja, neste år er det me som står der! Og så lo me godt!» legg Bjørnar til. Dei vann prisen i 2019 i kategorien barnemusikk. Etter at dei vann, var det mange som ville ha dei til spelejobbar, noko dei syntest var veldig kjekt. Dei seier at det har vore mykje «baluba» rundt utmerking. – Når eg kjem heim, treffer eg folk på gata eg eigentleg ikkje kjenner, som gratulerer meg og seier at dei er så stolte og gir meg klemmar, fortel Bjørnar.

Jule-EP

1. desember i år kom Naboen min ut med ein jule-EP med fire julesongar. Ein av songane er ein gamal julesong som Vegard har omsett til norsk. Når Naboen min lagar songar, er det Vegard som skriv tekstane, medan dei to samarbeider om melodien.– Det er jo litt rart å stå og spela julemusikk i august. Og så trur ein at ein er tidleg ute, men så går tida, og plutseleg sit ein der i slutten av november og jobbar som ein gal, for det må bli ferdig!, fortel Bjørnar om prosessen. – Men det har jo vore veldig kjekt, legg han til.– Altså, eg likar veldig godt jul, så for min del var det heilt supert å kunna begynna med det så tidleg, seier Vegard med eit stort smil.Naboen min har hatt eit godt samarbeid med Kvam Soul Children, som har kora på EP-en. Det viste godt då duoen, med god hjelp frå dei unge songarane, framførte dei nysleppte songane på julekonsert i Norheimsund tidlegare i desember.Songane på EP-en passar for alle, anskje aller mest dei yngste og dei eldste, men også ungdomar! – Folk vil jo ha litt sånn barnekor i jula, det høyrer med, seier Vegard.

Skribentane er elevar i medieklassen på Framnes kristne vidaregåande skule.Red.

Miriam Sundfjord og Borghild Gravdalredaksjon@hf.no