Frå Graceland til Bømlo

Kjellaren på Thon Hotel Sandven var med andre ord fylt til randa. Nær hundre personar fordelte på stolar og i vindaugskarmar fekk sjå urpremierar på 7 av 47 innsende bidrag.

Årets Littlarm-artist var Paul Simon. Juryen, som bestod av Brit Aksnes, Håvard Gjerde og juryleiar Kjersti Mjør, kalla opningsnummeret eit lokalfrieri av ei attdikting.

– Det har kome ein del av dei, men denne skilde seg ut, sa Mjør.

Skribent og teiknar May Linn Clement frå Norheimsund hadde skrive «Me and Julio down by the schoolyard» om til «Meg og Tove ein sein kveld i Grove». Microbandet framførte songen, som kalla fram både latter og stor applaus. Clement seier ho er kjempestolt over teksten og at han vart framført.

– Eg har venta heile livet på å få bruka «Tove» og «Grove» til noko nyttig, skriv ho i ein sms.

– Gledeleg overrasking

Vinnaren, Runar Bjørkvik Mæland frå Stord, hadde valt ut songen «Graceland» frå plata med same namn. Ifylgje Paul Simon-fan Mjør skal det vera den songen Simon sjølv tykkjer best om.

Av årets 47 bidrag skilde årets vinnar seg ut frå starten, sa juryen. I grunngjevinga vert songen skildra som uforklarleg rørande og frigjord frå originalen – samstundes som skribenten har klart å attskapa stemninga. Liner som «Sunnhordlandsbassenget skine som ein nypusst giftering» og «som om eg aldri merkte koss ho drog luggen vekk frå panno si» spelar på låtskrivaren sine metaforar og viser samstundes stor kjærleik for Sunnhordland, skriv juryen.

– Sjølv om du ikkje kjenner til låten «Graceland», står gjendiktinga så støtt på eigne bein at ho trygt kan kallast eit eige, tilsvarande vakkert åndsverk, skriv juryen.

– Det var ei gledeleg overrasking å vinna, seier Mæland.

Nynorsk eller dialekt

Stordabuen var med i tevlinga for fyrste gong, og tykte det var stas å vinna. Han opplevde arrangementet som vel gjennomført, med mange gode bidrag og eit dyktig husband. Mange bidrag hadde vore verdige vinnarar, og det gjorde det heile ekstra kjekt, seier han.

Eit krav i tevlinga er at tekstane må skrivast på nynorsk eller dialekt. Elles får deltakarane stor fridom. Ifylgje arrangøren er det viktigaste anten å fanga stemninga og bodskapen i teksten eller å gje songen ein heilt ny vri, gjerne tilpassa norsk samtid.

Minst like mykje vekt vert lagd på at lengda på vers og rytme er intakt og at flyten er god, slik at songen kan framførast nokolunde likt som originalen, står det i reglane.

Dei fem andre bidraga som vart framførte, var «Eg er så rik» («I am a rock») av Stig Røyrvik, «Berre kjøp ein L» («You can call me Al») av Tonje Gauden, «Bru over Puddefjorden» («Bridge over troubled water») av Marita Langelo og «Heimatt ein tur» («Homeward Bound») av fjorårets vinnar, Mette Lieungh. Også eit jurybidrag frå Kjersti Mjør og makker Bjarte Gullachsen var med. Dei hadde skrive «50 ways to leave your partner» om til «Få det unnagjort».

Songane vart framførte av husbandet, som bestod av Nan Espeseth, Stig Lundblad-Sandbakk og Jonas Selås Olsen, og Microbandet med Brit Aksnes og Kjersti Døssland.