Frå dvale til dynamikk

I 2022 feira musikkfestivalen 30 år. I fjor valde styret å ta ein pause for å reflektera litt i ei tid prega av endring, fortel festivalkoordinator Arngunn Timenes Bell.

– Me måtte ta ein fot i bakken. Alt endra seg rundt oss, og då må ein av og til snu på ting.

Dette året markerer ein ny start, med nye arenaer og eit fornya program som legg vekt på lokalt talent, fortel ho.

– Vil møtast

HF trefte Bell og styreleiar for festivalen, Geir Botnen, på Thon Hotel Sandven i byrjinga av april. Utanfor festivalhotellet vart hagen gjord klar for vår. Der to arbeidarar kosta vekk greiner og lauv, skal ei stor scene opp den fyrste helga i juni.

Botnen er ein veteran, både i musikken og Hardingtonar. Han har vore involvert i festivalen sidan starten i 1991. Bell, derimot, tok på seg rolla som koordinator i 2022. Festivalen har i år temaet «Møtast». Komiteen ynskjer å skapa møteplassar på både gamle og nye tomter.

Det er viktig å treffast. Det er då ein skapar spaning og god atmosfære. Då kjem ideane, og det er fruktbart, seier Botnen. Artist møter publikum. Publikum møter publikum. Det er frivillige med. Det vert mange møte på tvers, og det er i dei møta positive ting skjer, meiner Bell.

– Me hadde ein ide om å fornya oss litt, og det føler eg me har gjort. Det er nye arenaer og me har gjort ting litt annleis, seier Botnen.

– Kom som du er

I tillegg til nye møteplassar vert det ganske mange lokale fjes å sjå under årets Hardingtonar. På opningskonserten skal ikkje mindre enn hundre korsongarar frå Kvam vera med. Det er stas, synest Bell. Å involvera meir lokale aktørar var mellom det festivalkomiteen vart samd om då «alle» steinar vart snudde, fortel ho.

Og kanskje kan det hjelpa til med å senka terskelen litt? Det er nemleg eit mål festivalen har sett seg. Det er fort gjort å få eit slags stempel eller å verta sett i bås, seier Bell. Ho ynskjer å visa at arrangementet har noko som er relevant for alle.

– Det er ikkje slik at ein må ha ein spesielt trong snipp eller smokingbelte for å få koma på konsert. Det er faktisk lov å koma akkurat som ein er, seier ho.

Elles kan ein gå gatelangs i Norheimsund saman med Sjøforsvarets Musikkorps, som skal gå i parade gjennom Norheimsund sentrum. Også musikkorpset har med seg lokale. Musikantar frå musikklaga i Ålvik, Øystese, Norheimsund og Tørvikbygd har sagt ja til å vera med, fortel Botnen.

Fosse og Tveitt på fjorden

Då det viste seg at «harmonien» har «Peer Gynt» på programmet i år, jubla Bell og Botnen. Du kan ikkje få noko meir attkjennande, meiner dei. Både skodespelarar, dansarar og solistar deltek når soga om Peer Gynt skal framførast saman med orkesteret. Det passa festivalen midt i blinken.

Så er sjølvsagt Geirr Tveitt, som festivalen er tufta på, med i programmet. Botnen skal mellom anna spela Tveitt i Litteraturbåten «Epos», på veg mellom Norheimsund og Fosse. Arnhild Litleré er henta inn for å lesa tekstar av Jon Fosse – slik berre ho kan, ifylgje nettsida til festivalen.

Det handlar om å spela på Fosse-feberen, seier Bell. Både nobelprisvinnaren og Tveitt kjem til å vise att fleire stader i programmet, røper ho.