Fosse kjem med ny roman neste haust
Fjorårets nobelprisvinnar i litteratur, Jon Fosse, gjev ut romanen «Vaim» neste haust.
Boka kjem ut samstundes som Den internasjonale Fosse-festivalen opnar, melder Samlaget i ei pressemelding.
«Vaim» er den fyrste boka i ein serie på tre: «Vaim», «Vaim Hotell» og «Vaim Vekeblad». Dei kjem ut hausten 2025, 2026 og 2027.
Tekstane tek alle utgangspunkt i den fiktive staden Vaim, men handlar om ulike personar. Bøkene kan lesast som enkeltståande forteljingar. Fosse hadde byrja på bøkene då han fekk Nobelprisen i litteratur, og kvemmingen har fullført dei tre bøkene i ettertid, opplyser Samlaget.
Vaim er ifylgje pressemeldinga ei lita bygd ved fjorden som har både butikk, hotell og avis. I dei tre bøkene møter me innbyggjarar i bygda. Til dømes Jatgeir, som reiser på tur med sjarken og på underleg vis får med seg heim ungdomskjærleiken Eline.
Den nye Nobelserien som starta rett etter at Fosse vart kåra til vinnar, er seld i over 100.000 eksemplar det siste året. Talet på strøymde lydbøker er over 50.000 sidan oktober i fjor. Winje agency melder om stor interesse internasjonalt, og har gjort over 200 enkeltsal av titlane hans det siste året.
