– Føresetnadene har endra seg

Musikkfestivalen Hardingtonar er lova 500.000 kroner frå Hardangerstiftinga til å byggja eit såkalla skyveamfi i idrettshallen i Norheimsund. Før pengane kan utbetalast, må ein kunna visa fram ein konkret plan for arbeidet.

I desember sende Hardingtonar eit brev til heradet der det kjem fram at ein kan mista dei 500.000 kronene om ikkje ein plan snart er klar. Då HF tidleg i mai spurde samfunns- og utviklingssjef Jon Nedkvitne om Hardingtonar har fått svar, svara han at heradet har vore i munnleg kontakt med Hardingtonar.

– Føresetnadene har endra seg. Me må tenkja litt nytt no når den vidaregåande skulen òg skal leiga og bruka idrettshallen. Det vil verta trong for areal for lagring og liknande. Kva løysing som vil verta best, er enno ikkje avklara, skriv han i ein e-post til HF.