Forbetrar lyden i Kabuso
Kunsthuset Kabuso i Øystese får 106.000 kroner i stønad til akustisk utbetring av konsertsalen frå den nasjonale tilskotsordninga Kulturrom.
Konsertsalen er bygd primært for akustisk musikk, som kammermusikk, flygel og hardingfele, fortel avdelingsleiar Sissel Lillebostad.
Under konsertar med forsterka musikk har salen har vore problematisk, både i publikumsområdet og på scena. Ein slit då med å få gode lydbilete i heile salen. Ein akustikar analyserte tilhøva i fjor og gav i ein rapport råd om kva ein burde gjera for at salen kunne fungera også for forsterka musikk.
– Gler oss
Til hausten vil Kabuso kunna by på like gode tilhøve for både akustisk og forsterka musikk.
— Me gler oss til det, for det har vore eit dilemma, seier Lillebostad.
Kabuso får tilbod om mykje forskjellig musikk, både jazz, folkemusikk og klassisk musikk. Mange brukar forsterkarar. Salen er heller ikkje særleg godt eigna for tale. Han er bygd for at lyden skal slå tilbake inn i rommet. Viss ein sit langt bak, høyrer ein ikkje så godt kva folk seier. Lillebostad vonar at salen skal verta meir mangfaldig og tilpassa for fleire.
— Pengane frå Kulturrom vil sikra gode akustiske tilhøve, noko som vil koma både publikum og artistar til gode, skriv kommunikasjonsansvarleg i Kulturrom, Thomas Aslaksen i ei pressemelding.
Lillebostad har fått pengane, og kunsthuset skal byggja i samsvar med rapporten.
Tiltaka er forankra i ein akustisk forprosjektrapport om såkalla absorbentar på bakveggen i salen, opplyser Astrid Fuglevaag i Kulturrom.
Sikrar gode vilkår
Kulturrom er ei tilskotsordning for teknisk utstyr og lokale som skal bidra til at det finst gode øvingslokale og tekniske vilkår for framføring av musikk, dans og teater over heile landet.
Ordninga har sidan starten i 2009 investert over 340 millionar kroner av pengar frå fellesskapen i bygging og utrusting av kulturrom.
Målet er å byggja opp kulturrom med ein grunnleggjande teknisk infrastruktur som kan brukast av mange.
