Folket får vera med på målpristildeling

– Ikkje berre juryen kan koma med innspel. Alle kan gjera det, seier jurylem Sjur Vågen i Kvam Mållag.

Mållaget skal heidra ei verksemd som nyttar god og enkel nynorsk. Tidlegare har berre «fagfolk» vore med på å finna kandidatar. I år prøver laget altså ein ny vri.

Laget har difor laga til eit digitalt skjema der ein kan nominera kandidatar. Fram til 11. september kan ein bidra med både kandidatar og grunngjeving.

– Juryen har kome med framlegg, men me har òg fått framlegg om verksemder som me ikkje har tenkt på sjølve, seier Vågen.

Med seg i juryen som skal kåra ein vinnar, har han Astrid Farestveit Selsvold, Torleiv Ljones, Ingunn Hildonen Teigland og Evelyn Lygre Ljones. Prisen skal delast ut under Siderfestivalen i Øystese i oktober.