Følgde bølgjene til Strandebarm
Ekteparet Jan-Magnus og Maud Markhus trivst godt på sjøen. Dei plar vera minst éin månad i båt kvar sommar. I år sette dei kursen mot Strandebarm med tre barneborn om bord.
Tidlegare år har paret besøkt både Sørlandet, Sogn og Trondheim med båt. Til vanleg bur dei i Baldersheim i Bjørnafjorden. Det er fyrste gongen familien vitjar Strandebarm, og dei har mange lovord å koma med.
– Dette er ein fantastisk flott stad med eit veldig fint hamneanlegg. Eg er imponert! seier Maud.
Ho tykkjer staden er godt lagd til rette for folk i alle aldrar. Ein av fordelane er at butikken og friidrettsparken ligg i gåavstand. Maud vil definitivt tilrå staden til andre og koma tilbake sjølv, fortel ho.
Ski eller bading
Båtfølgjet kom dagen før og hadde lagt bak seg ein fin badedag då HF var innom hamna.
– Barneborna våre hadde lyst til å bada. Eg ville heller stå på ski på Folgefonna. Dei vann, konstaterer Jan-Magnus.
Han fekk likevel gått ein liten fjelltur medan sola skein. Dei neste dagane var det meldt store mengder vind og regn. Det var familien klar over, og dei var førebudde på å liggja i ro med båten i nokre dagar. Trass skiftande vêr er gjengen glad i båtlivet.
– Det er avslappande, og me kan flytta oss frå stad til stad, seier Maud.
Ho legg til at det er ein fordel å lika sjøen viss ein skal på langtur med båt. Ektemannen likar den sosiale sida av båtferien. Ifølgje han treffer dei nesten alltid kjentfolk i hamnene dei vitjar.
Færre på sjøen
Jan-Magnus fortel at det er færre båtar på sjøen i år enn tidlegare. Han meiner det kan vera eit resultat av høge drivstoffprisar og at mange heller reiser til Syden.
– Under pandemien var det vanskeleg å få hamneplass overalt – det var heilt sirkus! fortel han.
Maud legg til at det er kjekt med god plass på havet i år. Ho trur fleire har bytt ut båt med campingbil.
Mobil ferieheim
Ekteparet har hatt båt sidan 2003. Dei tykkjer det er viktig å ha plass til familien, og likar å ha med seg barneborna på tur.
– Med hytte må ein reisa til same stad kvar gong. No kan me feriera der me vil, fortel Jan-Magnus.
Paret likar å gå i fjellet og plukka bær, om det finst. Dei har kjøken om bord i båten, der dei lagar alle moglege middagsretter. Både kjøtkaker, fisk, pannekaker, hjortebiff, pølser og spagetti har stått på menyen.
Då HF var innom, hadde familien nettopp unt seg pizza frå kafeen i Strandebarm. Maud fortel at det er om å gjera å kosa seg, nyta ferien og slappa av. I tillegg understrekar ho kor viktig det er å nytta redningsvest på sjøen.
– Ein treng ikkje reisa så langt for å ha det godt. Og ein treng ikkje ha så stor båt for å ha det kjekt, meiner Jan-Magnus.
