Flettar saman fleire kunstformer
Musikk, tekst, biletkunst og video skal smeltast saman til heilskap i Kunsthuset Kabuso i helga.
Musikkverket «Møte med eiga maske» har urpremiere i kunsthuset sundag, skriv kunstnarane bak framsyninga i ei pressemelding. Verket inneheld musikk og tekstar laga av komponist og musikar Inger-Kristine Riber. Ho er inspirert av kunsten til biletkunstnar Lars Gunnar Polden. I framsyninga skal kunsten til Polden brukast som digital bakgrunn i spesiallaga filmar.
Musikken vert framført av Riber på piano, Arild B. Nielsen på trompet og Reidun Horvei, som syng og resiterer. Filmane er laga av Jøran Mjelde.
I 2023 delte kunstnarorganisasjonen for første gong ut prosjektstipend til eigne medlemer. Horvei fekk eit stipend, og tok initiativ til samarbeidet.
«Møte med eiga maske» vert i pressemeldinga omtala som nyskapande. Kunstnarane lovar ei framsyning som flettar saman musikk og visuell kunst og utforskar livet, kjensler og samfunnet.
«Møte med eiga maske» er ein del av markeringa av 30-årsjubileet til Harding Puls. Til hausten skal framsyninga på turné i Vestland og Møre og Romsdal.
