Fleire var innom biblioteka i Kvam

Soldal fortel om eit godt år for kvammabiblioteka. Ho synest at biblioteka i Kvam har godt eit utval bøker. Ho håpar at det medverkar til at folk held fram med å bruka lånekortet.

– Eg synest me har veldig mykje besøk, og det er veldig kjekt, seier Soldal.

Hovudbiblioteket i Norheimsund hadde fleire utlån enn i 2023, med ein auke på over 1.800 utlån, ein vekst på 8,6 prosent. Også biblioteket i Ålvik fekk ein markant auke i utlåna, med 726 fleire utlån enn i 2023. Det gjev ein auke på 15 prosent.

Soldal har ikkje tal for utlån av e-bøker og e-lydbøker, men opplyser at interessa har vore god, særleg for e-lydbøker.

Bibliotekbesøka i Kvam auka med 10,84 prosent. Det var 2.526 fleire besøk enn i 2023.

– Naudsynt med påmelding

Biblioteksjefen fortel at Les i lag-arrangementa ved hovudbiblioteket i Norheimsund har vore ein suksess. Annakvar veke samlast ti personar i ei lesegruppe og les tekstutdrag frå ulike bøker. Etterpå diskuterer deltakarane innhaldet. Det har vore naudsynt med påmelding på grunn stor pågang, forklarar Soldal.

– Å formidla litteratur er ei av kjerneoppgåvene til biblioteket, seier biblioteksjefen.

Les i lag startar opp att 22.januar.

Kvam bibliotek hadde 105 arrangement i 2024. Til saman deltok 2379.

Lokale innslag på topplistene

Soldal fortel at fleire av dei mest utlånte bøkene har handling frå Kvam og Hardanger-regionen.

– Dette interesserer lesarane våre, påpeikar ho.

To av bøkene til forfattar Vegard Markhus frå Norheimsund var blant dei mest utlånte barnebøkene. På 3.-plass kom boka «Alien i klassen – mitt liv på feil planet». Boka «Timothy mister seg sjølv» var på 10.-plass.

På lista over dei mest populære bøkene for vaksne var boka «Naustet» av Jon Fosse på 7.-plass.

Statistikken frå 2024 for biblioteket i Jondal var enno ikkje klar denne veka.