Fjordatonane fylte fleirbrukshallen
Også på den andre utgåva av storkonserten i Jondal fann deltakarane fjordatonen.
Medan eit dryss av nysnø fjelga dei høgaste fjelltoppane og det var helst litt kjølig ute, varma fire korps og to storband publikummet i storstova i Jondal laurdag ettermiddag.
Den fyrste utgåva av felleskonserten Fjordatonar fann stad i februar i fjor. Det skulle visa seg at det gjekk som arrangørane vona då: Ho vart ikkje den siste. No er samlinga definitivt ein tradisjon, slår Angunn Handegard Trå i Hardanger Big Band fast.
Dei som medverka i år, var arrangørane Herand Musikklag og Hardanger Big Band, pluss Nå Musikklag, Odda Storband, Hardangerbrua Musikklag og Odda Musikklag. I alt var kring 130 musikarar med. Ein del spelar i fleire av laga. Sist gong var også Ullensvang Skulemusikklag med, medan «brulaget» ikkje deltok den gongen.
– Det var suksess og god stemning. Det er så kjekt når dei gjestande laga seier at dei har hatt det fint og at dei vil koma att neste gong, samanfattar Trå.
Kring hundre personar løyste billett, pluss at ein del born kom med på kjøpet.
Ifylgje programmet skulle dei seks gruppene gje til beste 24 innslag i ymse sjangrar, med vertskapet som start og slutt. Konferansier og stuntpoet Arne Torget frå Kvinnherad batt det heile saman med humor, lyrikk og informasjon om deltakarar og nummera dei skulle framføra. I tillegg framførte han eit spesialskrive verk om Fjordatonar (sjå under).
– Me hadde ein fantastisk konferansier, seier Trå.
Ho fortel at fleire faktorar ligg bak flyttinga frå vinter til haust. Ikkje minst risikoen for kulde og glatte vegar og omsynet til annan aktivitet låg bak. Denne helga styrte ein unna både haustferie og ymse korpsarrangement. Dessutan, påpeikar Trå, får laga raskt noko å øva mot og ein litt brå start etter sommarferien.
Sjå fleire bilete frå konserten her:
