Figurar med hestehale i Kabuso

Langbord i foajeen var rigga til med teiknesaker, og benker og stolar dekte med skinn. Om lag ti personar, dei fleste kvinner, sessa seg tett saman med noko godt i glas og koppar.

– Eg er ein maksimalist av legning, sa Torpe då han innleia teikneverkstaden.

– Det gjeld om å ikkje leggja ei teikning frå seg for tidleg.

Underlege løysingar

Torpe presenterte publikum for ei oppgåve inspirert av bretteteikningane han laga då han var liten. Teiknearket skulle delast i tre; med ulike felt for hovud, kropp og bein. Einaste kravet til figuren denne kvelden var at han skulle ha langt hår i hestehale.

Oppgåva kunne løysast på mange måtar, sa Torpe. Han oppfordra folk til å koma med underlege løysingar. I tillegg understreka han at det ikkje skulle vera noko kvitt papir igjen når teikninga var ferdig. Heile arket skulle fyllast med strek og fargar. Oppgåva skulle utførast som eit samarbeidsprosjekt. Hovud, kropp og bein skulle teiknast i tre etappar, av tre forskjellige personar.

Dette var første gongen Torpe var instruktør i ein slik samanheng. Han ville berre inspirera folk til å ta fram kreativitet og sleppa seg laus, utan å stilla bestemte krav til arbeidet, sa han.

– Så lenge eg får teikna, er eg fornøgd, sa han.

Kjent namn

Torpe er fødd og oppvaksen i Øystese, gjekk på teikning, form og farge på Norheimsund vidaregåande skule og har mastergrad frå Kunst- og designhøgskulen i Bergen.

No bur han i Samnanger. Mange kjenner til han som illustratør i Morgenbladet og Bergens Tidende. Seinast laurdag hadde han ein fargerik illustrasjon i BT som kommenterer kronikken til Marie Misund Bringslid om personvern og sosiale medium.

I 2019 vann Torpe gullpremien i tevlinga Årets vakreste Bøker for teikneserieboka «Kjøt», saman med forfattar Mette Karlsvik. Same året vart han vald ut til å vera med på Statens 132. kunstutstilling, Høstutstillingen 2019, med biletet «Negativ abrasjon 2: Ei ulmande pipe». Torpe lagar også animasjonar, som har vore viste på festivalar i inn- og utland.

– Ideen med Kunstbar er å bruka teikning i ein verkstad som kan opna opp for fellesskap og gode samtalar, sa Sissel Lillebostad, avdelingsleiar for Kabuso og Storeteigen i Hardanger Voss museum.

I sving att

I bakgrunnen i foajeen surra musikk til arbeidet. Den første halvtimen var det nokså stille rundt bordet, men etter kvart vart både norsk politikk, valresultatet i Nederland, tekstuniverset til Jon Fosse, språkleg mangfald og mangt anna diskutert.

Kabuso hadde starta konsepta Drink & Draw og Kunstbar rett før koronaen sette ein stoppar for fysiske samlingar, sa Lillebostad. No i haust har ein teke opp igjen tråden. Kabuso tilbyr no av og til fredagskveldar med sosialt samvær og litt fagleg påfyll.

Dette året kombinerer Kabuso utstillinga «Handboren og veggfast», som står fram til nyttår, med Kunstbar Verkstad. Teikning er temaet for utstillinga, som viser ulike typar analog teikning på mange ulike materiale. Torpe er ein av tre utstillarar. Han har måla rett på eine veggen i utstillingslokalet i Kabuso, og viser i tillegg mange andre kunstverk frå karrieren sin.

8. desember skal Imi Maufe, ein av dei andre utstillarane, leia Kunstbar. Ho skal visa publikum korleis ei bok vert til.