Festival opna med regn: – Kom nett då det skulle koma
Dess fleire knutar på tråden, eller nærare bestemt tauet, dess betre er det for tauarbeidar Thor Jansen.
Jansen frå Fogn i Stavanger var ein av fleire utstillarar som var til stades i festivalteltet i Norheimsund i samband med Hardanger Trebåt- og Handverksfestival. Han var ikkje vond å be då han fekk telefon om å stilla opp.
Vil vidareføra yrket
– Då eg såg at Geir Madsen ringde, var eg klar med ein gong. «Eg stiller!» sa eg, fortel han.
I minst 12 år har tauarbeidaren delteke på trebåtfestivalen. Han er glad i å reisa, og er oppteken av å få synt fram arbeidet sitt.
– For meg er det viktig å gjera det eg kan for å vidareføra eit yrke som står i fare for å døy ut, seier taumakaren.
Ifylgje Jansen sjølv er han truleg den einaste mellom Kristiansand og Kvam som er autorisert i faget. Han vonar å bidra til at fleire vil verta interesserte i tauproduksjon.
Bruksprodukt til båtar
For Jansen vart interessa for tauarbeid meir enn ein hobby etter at han pådrog seg ein ryggskade. No sel han bruksprodukt, i hovudsak til båtar, laga av ulike sortar tau.
Tauet fortel han at skal tola ein støyt. Fleire av produkta er laga av Manila-tau. Desse skal vera brannsikre, og vert mellom anna nytta til produksjon av redningstau og leiderar til båtar, ifylgje Jansen.
For tauarbeidaren har det i tida med pandemi mellom anna vore vanskeleg å få tak i naudsynte materialar til arbeidet. Han er glad for at mykje er på veg attende til normalen, og tykkjer det er moro å vera tilbake i Norheimsund.
Sjå bileta frå festivalområdet:
– Typisk festivalvêr
Medan utstillarane heldt seg tørre inne i festivalteltet, var det tidvis hakket våtare for dei frammøtte som stod utanfor. Då Bård Kolltveit, direktør ved Norsk Sjøfartsmuseum, heldt opningstale, var det ikkje berre festivalen som opna seg. Det gjorde himmelslusene òg. Vekslande vêr prega laurdagen – inntil det gjekk over til stabilt regn i kveldinga.
– Me startar med typisk festivalvêr. Regnet kom nett då det skulle koma – det høyrer liksom med. Men regn i håret, det tyder lukke, sa Kolltveit.
Han takka mellom anna Hardanger fartøyvernsenter for å halda liv i gamal båtbyggjarkunst.
– Me kan snakka om mange former for brukskunst. For meg er kanskje den flottaste, ubrotne brukskunsttradisjonen me har, båtbyggjarkunsten. Mellom anna takk vere stader som Hardanger fartøyvernsenter, sa Kolltveit.
– Ingen rekord
Om lag 2.500 personar innom festivalen som var den 22. i rekkja, skriv festivalsjef Geir Madsen til HF. Medan det vart seld kring 1.400 billettar laurdag, var det gratis inngang sundag.
Sjølv om vêret var av det våte slaget heile helga, påverka det ikkje humøret til gjestene og utstillarane, skriv festivalsjefen.
Ifylgje Madsen stilte 35 trebåtar opp på arrangementet, noko som var langt frå rekorden. Av desse var 13 av dei nye deltakarar.
