Ferske festivaldeltakarar rosar larmen: – Kjempegod stemning

I helga var ho ei av festivaldeltakarane som opplevde Bygdalarm for fyrste gong.

Laurdag var Elde til stades på festivalområdet saman med Sindre Aalvik Stranden frå Ytre Ålvik. Då ho snakka med lokalavisa etter at konsertane var ferdige, fortalde ho at ho var godt nøgd med arrangementet i Norheimsund.

– Stemninga har vore kjempegod! seier ho.

At det i periodar vart noko våtare enn ho vona, gjorde ikkje noko. Elde understreka at dette var fyrste, men langt frå siste gong ho kom til å delta på festivalen.

Også Guro Tjosaas og Sander Løvik hadde sitt fyrste møte med musikkfestivalen. Dei hadde reist frå Tromsø for å besøka slekt i Hardanger og å få med seg larmen. Medan Tjosaas var nøgd med artistoppsettet, var det helst éin artist Løvik ville høyra på.

– For meg er det Lars Vaular som gjeld. Dei andre artistane er ikkje heilt min smak, seier han.

Båe tykte at Bygdalarm var eit artig konsept, og at det var positivt at arrangøren samarbeider med lokale næringsverksemder.

– Det er flott at ein får til slikt på bygda, seier Tjosaas.

– Heilt nydeleg!

Artisten Synne Vorkinn, også kjend under artistnamnet Synne Vo, var imponert over både arrangør og festivaldeltakarar etter å ha opptredd på scena laurdag.

– For eit livleg publikum og hyggeleg crew. Dette var koseleg og proft på same tid, seier ho.

For jenta frå Gudbrandsdalen var dette hennar tredje festivaljobb utan restriksjonar. Ho var overvelda av responsen frå publikum, og fortalde at ho var overraska over kor mange som kunne tekstane til låtane hennar.

Ifylgje henne utmerkte festivalgjengarane i Norheimsund seg då dei song med til låten Heime, som handlar om det å flytta frå bygda til byen. Vorkinn fortalde at ho ikkje har opplevd at så mange har sunge med på låten før.

– Når så mange syng med, må det vera noko som treff. Det er heilt nydeleg! seier ho.

Gudbrandsdølen visste ikkje så mykje om Bygdalarm frå før, men fortalde at andre artistar har snakka varmt om festivalen.

Hennar eiga oppleving laurdag svara til forventningane.

– Herregud for ein gjeng! Eg kan absolutt tenkja meg å koma tilbake, seier ho.

Også artisten EMIR stod på scena laurdag. For rapparen frå Bergen var Bygdalarm det fyrste festivaloppdrag i år.

– Dette var deileg! seier han.

Artisten, som fortalde at han har slekt på Nå og Grimo, har vore mykje i Hardanger og er glad i bygdene langs fjorden. Han tykte det var moro å koma til Norheimsund for å spela. Då han var ferdig med konserten, såg han fram til å fortsetja festen på klubben som var laga til på Straumen kjøpesenter.

– Moro å arrangera

Måndag føremiddag fortalde festivalsjef Ida Sørheim at ho var godt nøgd med avviklinga av arrangementet. Ifylgje henne har styret fått mange gode tilbakemeldingar, og det meste gjekk som planlagt. Ho var mellom anna positivt overraska over kor fort det gjekk å rigga klart området. Det einaste ho nemner av utfordringar, var at dei i ein periode mangla nok drikkeglas i baren.

Kring 1.300 publikummarar var på området fredag. Laurdagen var heilt utseld. Då fylte 1.700 festivalglade området mellom hesene.

Festivalsjefen tykkjer at det var moro å arrangera festival att. Ifylgje henne har det vore mykje planlegging gjennom heile året. Ho takkar mellom anna festivaldeltakarar, artistar og lokale aktørar for at gjennomføringa av festivalen vart vellukka. I tillegg gjev ho ein ekstra takk til dei frivillige.

– I år er det dei frivillige sitt år. Men for oss er det dei frivillige sitt år kvart år. Me set stor pris på alle som stiller opp. Det er dei som er Bygdalarm, understrekar ho.

Framover ventar eit møte der årets festivalhelg skal evaluerast. Så startar planlegginga av neste års Bygdalarm. For larm vert det også neste år, slår festivalsjefen fast.