Femner om frodig fauna

Om lag førti personar tok turen til det historiske tunet for å vera med på opninga av kunstutstillinga til kunstnaren frå Hålandsdalen. I det såkalla «kubbefjøset» kunne publikum nyta synet av både pastellbilete og akrylmåleri.

Inspirasjonen finn kunstnaren utandørs. Særleg den ville og frodige vestlandsnaturen er inspirasjon til mange av bileta. Også interessa for å ta vare på natur, dyreliv og kultur har inspirert han.

– Eg har vore mykje i skogen og har alltid hatt interesse for både teikning og måling, og natur og dyr. Det har liksom gått hand i hand heile tida, fortel han.

– Gode kvalitetar

Rød, som ikkje har vore aktiv med utstillingar sidan tidleg på 2000-talet, var ikkje den enklaste å få tak i, ifylgje gardseigar Kåre Nes. Men til slutt sa han ja.

– Det er vel eg som har vore på. Eg kjenner til han frå før. Han har gode kvalitetar, vil eg påstå, seier han.

– Me er veldig glade for at han ynskte å stilla ut her hjå oss.

Det er nokre år sidan Rød fyrst vart spurd. Seinare har han vore innom for å kikka på lokala, og etter kvart modnast førespurnaden.

– Det hadde gått så lang tid, og så tykte eg det var litt spennande, seier Rød.

Lokalet er fantastisk, synest han.

Fann draumen

Den som truleg vart dagens fyrste kjøpar, var Sissel Holdhus. Ho hadde teke turen frå Hålandsdalen for å sjå på bileta. Kunstnaren kjende ho godt til frå før.

– Eg trefte han tidlegare og sa at han måtte snart ha utstilling. «Du må ikkje sitja og lata som du ikkje teiknar», sa eg til han. Og det hugsa han, veit du, fortel Holdhus.

Biletet Holdhus forelska seg i, syner mellom anna delar av ei gamal hytte. Det skal vera nabohytta hennar på fjellet, fortel ho. Og med kunsten på stoveveggen heime kan ho enkelt drøyma seg til fjells att.

– Det er heilt fantastisk, seier Holdhus.

På veggen får kunsten selskap av fleire verk frå same mannen.

Glade for gjester

Utanom det som har vorte ei årleg kunstutstilling, driv Kåre Nes og Anne Karin Laupsa Nes både overnattingsverksemd og mjølkeproduksjon. Overnattinga er basert på sjølvstell, og føregår for det meste på sommarstid og i jaktsesongen.

– Korleis har sesongen vore så langt?

– Heilt grei. Han har ikkje på nokon måte vore slik fleire skreiv, seier Nes.

Bonden siktar til at fleire spådde om at reiselivet verkeleg kom til å bløma etter pandemiåra, og at Noreg kom til å oppleva ein såkalla «boom». Det har ikkje skjedd, meiner Nes.

– Men når ein har opplevd pandemiåra, og kan samanlikna med det, så veit ein å verdsetja at det er gjester på tunet, seier han.

Utstillinga står til 10. september.