Fem bilete frå Vestlandet i internasjonal fotofinale
Fem foto frå Vestland fylke som dokumenterer norsk kulturarv på Wikipedia, kjempar om premiar verdt 100.000 kroner. Dei internasjonale vinnarane av Wiki Loves Monuments 2022 blir kåra om få dagar.
Tre bilete frå Tyssedal, som ligg ved Sørfjorden i Hardanger, skilde seg ut i den norske delkonkurransen. Alle var tekne av éin fotograf, noko den norske juryen ikkje var klar over. Jorulf Kyrkjeeide bur i Odda, men arbeider i Tyssedal. Han fekk første-, tredje- og fjerdeplass med motiv frå den historiske industristaden.
– Eg tek ofte bilete i området før arbeidsdagen startar, og frå kontoret har eg utsikt mot det majestetiske gamle kraftverket. Det er flott når det er lyssett, men ligg dessverre i mørke no som kraftprisen er så høg, seier Kyrkjeeide i ei pressemelding.
Artikkelen held fram under annonsen.
Den norske andreplassen gjekk til Marianne Sunde Hestetun for eit haustbilete frå Eidsvatnet i Skjolden i Sogn. Den austerrikske filosofen Ludwig Wittgenstein budde der frå 1913 til første verdskrigen.
Femteplassen gjekk til eit bilete av Urnes stavkyrkje på sørsida av Lustrafjorden i Sogn. Fotograf Jarle Kvam gjekk inn til fots ein tidleg vintermorgon og tok biletet.
Wikimedia Norge (WMNO) er den norske arrangøren, og representantar frå Fortidsminneforeningen, Kulturvernforbundet og NAFs vegbokredaksjon bidrog i juryen.
Vinnarane av Wiki Loves Monuments blir kåra om kort tid.
(©NPK)
