Fekk tilskot til digitale hopehav

Pengane skal gå til utvikling av digitale, sosiale møtestader i eit samarbeid med biblioteka dei to stadene. Møta vil gå føre seg på den digitale videoplattforma Whereby.

Som ein konsekvens av koronapandemien har både frivilligsentralane og biblioteka måtta innstilla ordinær aktivitet.

– Me synest det er svært synd at me ikkje kan møtast. Dette er «bale» for alle, og me ynskjer å bøta på dette gjennom å utforska digitale plattformer å møtast på. Me er allereie i gang med kursing i bruk av Whereby, og her i Kvam har me prøvd digitale språktreff gjennom påsken. Me veit ikkje heilt kva me gjev oss ut på. Me lærer i fart og skal etter kvart dela erfaringane våre med andre frivilligsentralar i Vestland og Rogaland, seier dagleg leiar i Grannehjelpa, Sidsel Haugen.

Grannehjelpa set i gang for fullt med språktreff på tysdag.

– Det finst mange digitale møterom, men då treng me litt opplæring og å venja oss til å bruka dei. Det er bakgrunnen for at me søkte stiftinga om pengar, seier Haugen.

– Inspirerande samarbeid

Det er lettare å samarbeida med folk når ein er lenger vekke, meiner Haugen. Ho og dagleg leiar i Klepp frivilligsentral kjenner kvarandre godt frå før, og det gjorde at dei ville søkja om pengane til prosjektet saman. Dei ville òg involvera biblioteka. Dei to frivilligsentralane er to ulike organisasjonar som driv på kvar sin måte, men båe har kvinnegrupper og språktreff.

– Me tenkjer at det er svært inspirerande å læra av kvarandre. Det gjeld også biblioteka. Klepp er ein litt større kommune enn Kvam. Han er òg tett på Stavanger og Sandnes og andre store kommunar. Det kjem til å verta eit fruktbart samarbeid, seier Haugen.

Kompetanseheving

Leiaren seier prosjektet er eit tiltak for å heva kompetansen, både for dei som jobbar i frivilligsentralane og dei som jobbar på biblioteka, og for alle deltakarane på språktreffet og kvinnegruppa. Det er gratis å vera med.

Skal ein bruka digitale møterom, må ein vita korleis ein skal logga seg på, via telefon, nettbrett, pc og Mac. Det fungerer ikkje så godt å ha tjue personar i eitt digitalt møterom, så dei må ha fleire.

– Nettbrett til gruppeleiarane er inkluderte i pengane me får, seier Haugen.

Prosjektet er heilt i starten.

– Etter kvart kan me kanskje ha kurs via nett? spør Haugen seg.

Kan nå nye menneske

Det er frivillige som driv språktreffa og kvinnegruppene. Dette er tiltak som har eksistert i Grannehjelpa i mange år. Mange som er med, er nysgjerrige på andre menneske og på andre språk.

Det kan vera at det er personar som kunne ha tenkt seg å vera med, men som før ikkje har hatt høve til å koma seg til Norheimsund og biblioteket. No kan ein delta frå heimen eller ein annan stad.

– Me låner ut dei digitale møteromma, så dei kan nyttast til andre ting òg. Ein kan ha leksehjelp, eller læra seg å strikka, over nett. Det er mange moglegheiter. Til dømes kan ein ha føredrag på Whereby. Me synest det er stas å samarbeida med andre frivilligsentralar utanfor vår region, seier Haugen.

Ho vil svært gjerne at folk som har idear om kva ein kan få til via digitale møterom, eller har lyst til å vera med, tek kontakt.