Fekk pengar til kulturminne
Ni kulturminne i Kvam og Jondal har fått pengar til restaurering frå Kulturminnefondet.
I fjor fekk 115 prosjekt i Vestland støtte frå staten til å setja i stand kulturminne. Det melder direktør i Kulturminnefondet, Simen Bjørgen, i ei pressemelding. Totalt fekk søkjarane lovnad om inntil 18 millionar kroner i stønad.
Ifylgje Bjørgen har mange timars eigeninnsats ført til nye verdiar som er tekne vare på for framtida. Det er prisverdig at så mange i Vestland ynskjer å ta grep for å halda fram med å bruka eller byrja å bruka kulturminne igjen, heiter det i pressemeldinga.
– Ved å bidra til at eit mangfald av kulturminne i Vestland blir sett i stand, sørgjer ein for eit grunnlag for framtidige opplevingar, kunnskap, utvikling og verdiskaping, seier Bjørgen i pressemeldinga.
Mange minne er eigde av privatpersonar, men samstundes er dei med på å utgjera ein stadsidentitet og ein felles kulturarv.
Til saman vart det søkt om 515 millionar kroner til 1.688 prosjekt i Noreg i fjor, ifylgje pressemeldinga.