Fekk i pose og pengesekk
Vegard Eikeland Sangolt (16) fekk ikkje berre talentstipend, men også æra av å spela trommer med sjølvaste Bjørn Tomren.
Ungguten frå Norheimsund er ofte å sjå på konsertar, anten han bidreg som trommeslagar eller hjelper pappa Vidar Sangolt i Vestprod AS med å levera lyd- og lystenester.
Laurdag kveld var ikkje noko unntak. Også då var han med pappa på jobb under Hardingtonar-konserten med Bjørn Tomren, kjend frå «Stjernekamp», i hotellhagen.
Ein uvanleg kveld vart det likevel, ettersom ungguten eit stykke ut i konserten fekk koma opp på scena, ta plass bak trommesettet og syta for rytmane til det eine nummeret til romsdalsartisten, «Imjin River». Det såg kvemmingen ut til å trivast med.
– Teft, kreativitet og vilje
Som om ikkje det var nok, kom avdelingsbanksjef May Turid Tømmervik på scena for å kunngjera at eit talentstipend frå Sparebanken Vest er tildelt Sangolt. Prisen tilfører han 10.000 kroner. Dei kan han bruka nett slik han vil.
Ifylgje Tømmervik viste Sangolt tidleg interesse for musikk, lyd og produksjon. Gjennom åra har han arbeidd disiplinert og utvikla seg jamt og trutt til å verta ein habil musikar med moge spel, kreativitet, teft og vilje til å stå på.
– Det blir veldig spanande å fylgja han vidare, sa Tømmervik.
Krøkt som liten
HF treffer Sangolt i ausande regn dagen etter, medan han er i ferd med å hjelpa til med å rigga før konserten med Naboen min på den same scena. Olav Skeie Lid kjem bortom for å gratulera ungguten, og spør kva han skal bruka pengane på.
– Eg er god til å bruka pengar, så det vert ikkje noko problem, seier 16-åringen og ler.
Til HF seier Sangolt at han reknar med at pengane ryk med til «noko trommegreier». Han har satsa på trommer sidan han var liten, enkelt og greitt sidan han syntest at instrumentet var kult. Han har elles sunge ein del som solist i ungdomskoret.
Både far og mor er musikarar, og sonen er som nemnt ofte å sjå saman med faren på jobb. I hovudsak hjelper han til med å rigga til konsertar, men stundom får han ansvar for å styra lysproduksjonen.
– Kunne du ha arrangert ein konsert heilt åleine no, om du måtte?
– Det spørst litt på omfanget. Eg har enno mykje å læra, men eg kunne kanskje fått til noko lite, seier Sangolt, som vurderer å satsa på musikkutdanning.
Bjørn Tomren med band trekte ifylgje festivalsekretær Arngunn Timenes Bell truleg kring 280 personar i det litt upålitelege vêret.
Du kan sjå fleire bilete frå konserten her:
