Feirar i Gamlastovo

Det ynskjer spelemannen å feira med framsyninga Eit band, ein jukebox og ein gut som gjekk forbi i Gamlastovo Gardsrestaurant på Fykse laurdag.

Det opplyser Hamre i ei pressemelding. Ole Gjerde i Felemakarscenen er arrangør.

Dei aller fleste ungdomar som voks opp på 1960-talet, kasta seg på den nye ungdomskulturen. Slik var det også i heimbygda til Hamre, Granvin. Rundt jukeboksen på den lokale kafeen samla dei unge seg rundt dei nyaste Beatles-låtane. Men éin gut lét seg ikkje lokka inn. Han hadde heilt andre interesser og gjekk målmedviten forbi på veg til læremeisteren Anders Kjerland for å tileigna seg ein ny slått.

Snart 60 år seinare er Knut Hamre framleis meisterspelemannen, og i framsyninga fortel han om livet som folkemusikkutøvar. Han skildrar opp- og nedturar og om menneska som fekk ekstra mykje å seia for han som spelemann: Anders Kjerland, Olav H. Hauge og Sigbjørn Bernhoft Osa. Seinare møtte han spelemannen Bjarne Herefoss og fleire utanlandske utøvarar som vart viktige for han både musikalsk og på det menneskelege plan.

Hamre skal framføra slåttar han har eit nært forhold til.

– Me dukkar òg ned i filmarkivet og lèt Knut kommentera enkelthendingar frå eit langt spelemannsliv. Her får du også servert historier du garantert ikkje har høyrt før, skriv Gjerde.

Programleiar og intervjuar på Fykse er ein av dei som stod rundt jukeboksen på den lokale kafeen, nemleg journalist og frilansskodespelar Nils Erik Kvamme.

Om Gjerde skal tippa, trur han Hamre vil spela slagerar som Hildalen, Vestlendingen og Spelar-Guro.