Feirar eit halvt liv med Hardanger Big Band

Sjølv om bandet vart stifta for 35 år sidan, må ein ifølgje Nielsen endå lenger attende for å forstå kvar den første spira vart sådd. For 60 år sidan var den då ti år gamle Nielsen på Tivoli i København saman med faren.

– Me gjekk forbi ein paviljong der eit storband spela. Eg vart så fengsla av musikken at eg nekta å gå vidare. «Vil du ikkje prøva karusellane?» spurde far. Det ville eg ikkje. Eg ville berre høyra storbandet spela. Konserten varte sikkert i ein time. Eg stod der heilt til dei var ferdige. Det var der interessa for storbandmusikk oppstod, fortel han.

– Det aula med talent

Mange år seinare flytta Nielsen til Jondal for å jobba som musikkleiar i Jondal kommune. Oppgåva var å dirigera lokale korps og kor og utvikla musikkmiljøet i kommunen.

– Eg skjøna fort at Jondal trong ein musikkskule, og starta det som etter kvart vart Jondal kulturskule. Samstundes hadde eg frykteleg lyst til å spela i storband. Det fanst ikkje noko slikt i Hardanger. Då måtte eg pendla til Bergen. Sidan det aula av musikalske talent rundt kulturskulen, bestemte eg meg for å starta eit storband i Jondal, fortel Nielsen.

I 1987 vart storbandet offisielt skipa som Jondal Storband.

Fleire av medlemmene frå dei første åra har vorte profesjonelle musikarar. Mest kjend er truleg Herborg Kråkevik, som var den første vokalisten. I august 2000 skifta bandet namn til Hardanger Big Band.

– Dei første åra var alle medlemene frå Jondal. Etter kvart endra dette seg. Då var eit namneskifte naturleg, fortel Nielsen.

I dag bur dei fleste medlemene i Ullensvang eller Kvam, eller har røter i ein av dei to kommunane.

Nielsen fortel at storbandet har hatt lojale medlemer og lite gjennomtrekk. Likevel er det, om ein ser bort frå han sjølv, berre éin medlem som har vore med sidan starten. Medlemen er pianist Gro Belsnes Eide.

– Då eg kom til Jondal, var ho elev på Jondal skule. Eg la merke til henne på ein skulekonsert der ho spela musikk av Chopin. Eg skjøna at henne måtte eg få med i bandet, fortel Nielsen.

– Er viktig for meg

Nielsen fortel at HBB har betydd mykje for han.

– I bandet får eg utøva musikk i stort format saman med andre. Samstundes er det sosialt, og me har det veldig triveleg saman. Bandmedlemene er venene mine, og eg er alltid i godt humør når eg har vore saman med dei, seier han.

Å halda liv i eit storband på ein liten plass har ikkje berre vore ein dans på roser.

– Det er noko anna å driva eit slikt band på ein liten stad enn i ein by. I ein by kan ein velja og vraka i medlemmer. I Hardanger har det i periodar vore krevjande å få tak i dei folka me treng, seier han.

Utfordringane har gjort at bandet har hatt periodar med mykje aktivitet og periodar med lite aktivitet. Heilt brakk har det likevel aldri lege.

– Det har vore periodar der eg har vurdert å gje opp. Heldigvis har desse periodane vore svært korte. Sjølv om me er eit utkantband, har me klart å framføra mykje nyskriven musikk saman med svært dyktige musikarar. Det er eg stolt over. Det er litt unikt. Det er stort sett berre dei store banda frå Bergen og Oslo som framfører ny musikk, seier han.

Jubilerer med gjester

På programmet laurdag står mellom anna eit utval låtar frå den 35 år lange historia til bandet. I tillegg vert det urframføring av bestillingsverket Hardanger Big Band – Occurance, som er spesialskrive av musikaren, arrangøren og komponisten Jens Wendelboe.

– Bestillingsverket inneheld mange ulike stilartar og mange ulike måtar å spela på. Mellom anna skal to solistar syngja utan ord. Det vil seia at stemmene deira vert ein del av orkesteret. Det vert kjekt og utfordrande, seier Nielsen.

Til konserten har bandet samla ei imponerande liste med gjesteartistar. Det vert innslag med vokalist Nina Jori Pedersen, skodespelar og songar Frank Kjosås frå Øystese, gitarist Gisle Torvik frå Tørvikbygd og omtala Wendelboe. Øyvor Bakke frå Herand skal vera konferansier.

– Det mange kanskje ikkje veit, er at ho spela trompet i bandet i ein periode, fortel Nielsen.

Å finna ein dag som passa for alle, var ikkje enkelt.

– Dette er travle folk. Nøkkelen var å starta planlegginga tidleg. Me har jobba med dette i meir enn eitt år. Samstundes trur og håpar eg at me har klart å samla alle desse folka fordi dei har lyst til å spela med oss, seier Nielsen.

Sjølv om Nielsen har bikka 70 år, har han ingen planar om å leggja inn årane.

– Storbandet har fått til mykje allereie, men det er særleg éin ting eg drøymer om. Eg har veldig lyst til å spela på jazzfestivalen i København, og då sjølvsagt på ein paviljong på Tivoli, seier han.