Feirar 30 år med songglede

– Framsyningane vert ei multimedieoppleving for publikum. Dei får det både i augo og øyro, fortel dirigent Olav Skeie Lid.

Musikalske høgdepunkt frå dei 30 åra til koret skal kombinerast med bilete på storskjerm. Kvammakoretveteran Kristin Kollsgård Børve vert forteljaren som knyter framsyninga saman, fortel Lid.

Dei to framsyningane vert identiske. Begge skal vera i Kunsthuset Kabuso. Det vert ikkje berre musikk frå fortida. Koret har lagt inn nokre smakebitar frå ting som kjem. Mellom anna har koret laga ein musikal med Beatles-musikk som kjem til våren. To nummer frå denne vert ein del av jubileumskonserten. Beatles-framsyninga har vore planlagd i tre år. Ei veke før premieren gjorde koronaviruset at framsyninga vart avlyst.

– Har det kjekt saman

– Ein fin gjeng, er det første Lid seier når han vert beden om å beskriva Kvammakoret.

– For meg er korøvingane ein god sosial stad å vera. Me vert kanskje aldri noregsmeistrar i korsong, men me har det veldig kjekt saman. Koret er ikkje berre ein triveleg samlingsplass, eg meiner det er ei viktig, lita brikke i det lokale kulturlivet. Kvammakoret er eit kor det er vel verdt å feira, seier han.

To av veteranane i koret tenkjer på same måte. Ekteparet Kari Haugen Huse og Bjørn Huse har vore medlemer sidan starten.

– Eg klarar ikkje å skofta ei einaste øving fordi me har det så kjekt saman, seier ho.

– Det er kolossalt sosialt. For meg som har passert 70, er det ein stor oppkvikkar. Eg trur Kvammakoret er med på å hjelpa oss med å halda hovudet klart, seier han.

Historietime

Lid fortel at Torleiv Ljones tok initiativet til å starta Kvammakoret i 1992.

– Torleiv var leiar i Tørvikbygd Songlag. Då songlaget sigla inn i solnedgangen, med det velkjende fenomenet tilårskomne medlemer som bakgrunn, nytta han høvet til å dra i gang eit prosjekt for å få heile Kvam samla under eit kor. Det lukkast han stort med, seier Lid.

Ljones er framleis aktiv i koret, i ein alder av 81 år.

Elin Langenes var den første dirigenten i Kvammakoret. Ho vart med på lasset frå Tørvikbygd Songlag. Etter henne har både Margrete Lid Kjosås, Anne Karin Stormyr, Belinda Lerøy, Sevi Asgarova Øvrehus og Lid sjølv hatt dirigentrolla. Lid har vore dirigent i to periodar. Først frå 1995 til 2005 og sidan frå 2017 til i dag.

Tidleg på 2000-talet, i Lid sin første periode som dirigent, byrja Kvammakoret med større produksjonar i musikal-sjangeren. Koret har mellom anna framført både Les Misérables og Porgy and Bess.

– Musikalar vart eit lite varemerke for koret, men me kombinerte heile tida musikalane med vanlege konsertar, seier Lid.

Koret har òg sunge i høgda.

– For mange av oss er kanskje konserten på Breidablik i 2002 eit høgdepunkt. Der song me for 500 kvemmingar på 1.100 meters høgd, fortel Lid.

Drøymer om ungdommen

Talet på medlemer har variert. Koret var størst då det var nytt. På den tida hadde koret fleire enn 80 songarar. Sidan gjekk det sakte, men sikkert nedover. I ein periode hadde koret under 30 medlemer. Dei siste åra har medlemsmassen auka. I 2022 har koret 45 medlemer.

– Jubilanten er etter måten oppegåande, men ingen av oss vert vonbrotne om det skulle dukka opp yngre songarar. Det er ikkje berre gamlingar i koret, men snittalderen er nok på veg til himmels. Eg håpar me ikkje berre vert ein gjeng med gamlingar som trivst saman, men at me klarar å rekruttera yngre krefter, seier Lid.

Lid innrømmer at koret ikkje har leita veldig aktivt etter ungdommen.

– Der har du truleg eit område der me må verta flinkare på. Det å musisera saman og stå fram nesten som éin organisme, er noko av det flotte med korsong. Diverre har songen på mange måtar forvitra i Noreg. Me som er interesserte i korsong, har ei stor oppgåva med å halda songen i samfunnet ved like, seier Lid.