Feira fire tiår med messe
Husflidsmessa vart arrangert av Øystese Kvinne- og Familielag (ØKF) for 40. gong laurdag.
Medlem i messestyret til ØKF, Merethe Gauden, fortel at laget la seg litt i selen for å markera jubileet.
– Me har pynta oss med festlege hattar. Dei har eit rosa slør på seg. I år skal me markera jubileet ved å gje ein del av overskotet til Rosa sløyfe-aksjonen.
I praksis inneber det at pengane går til inntekt for brystkreftforsking.
Gauden trur messa har endra seg ein del dei siste 40 åra. Det er i dag lite fysiske pengar i omløp. No handlar dei fleste med Vipps, påpeikar ho. Ho synest framleis at det er godt frammøte. Folk kjem for å sjå på utstillingane og kjøpa varer. Mange sit ved borda og pratar med kvarandre, seier ho.
– Me får aldri nok bord, fortel Gauden.
45 utstillarar var på plass i Øystesehallen. Blant utstillarane var Reidar Forland frå Sotra. Han selde leikebilar i treverk. Å laga leikebilar har vore hobbyen hans i 30 år, fortel han. Dette var hans fyrste gong på Husflidsmessa.
– Eg fekk eit tips om messa via ein kamerat. Då eg melde meg på, var det heldigvis plass til meg, seier Forland.
Kring 60 medlemar frå ØKF var med for å organisera den seks timar lange tilstellinga. Allereie då HF var innom klokka 13, hadde over seks hundre personar vore innom. Då dagen var omme, hadde 753 løyst billett. I tillegg var mange born, som fekk koma gratis inn, innom.
Sjå fleire messebilete her:
