Feira at redningsaksjonen kan byrja

Startskotet vart markert med geværskot over fjorden, fanfarar og talar. Ikkje minst planta tre av institusjonane som har vore med på å finansiera prosjektet, kvart sitt gammaldagse epletre i Holmsund.

- Ein viktig plass

Nedre Valland og Nes grendelag har vore ein pådrivar for å redda verkstaden, og det er laget som har fått jobben med å søkja om pengar til arbeidet. Ordførar Jostein Ljones var ein av dei som sleppte til på talarstolen. Han rosa innsatsen til laget.- Holmsund er eit viktig rekreasjonsområde og eit viktig kulturlandskap sentralt i kommunen. Heldigvis ser det ut til at søknadene om pengar får positive svar og at det er realistisk at me no skal klara å setja denne plassen i den standen han fortener. Sjølv om kommunen forvaltar dette området, veit ein at ein kommune ofte er lite flink til å gjera ting som ikkje må gjerast. Utan engasjementet til grendelaget, er det ikkje sikkert bygget hadde vorte redda, sa han. Byggmeister Haakon Kvestad har fått jobben med å restaurera bygget, fortel grendelagsmedlem Eva Cecilie Holm. Ho fortel at Kvestad har mykje kunnskap om restaureringsarbeid. Mellom anna brukar Hardanger og Voss museum han til å restaurera bygg.

Ikkje fullfinansiert

Det er rekna ut at restaureringa vil kosta 888.500 kroner, ekskludert meirverdiavgift. 554.000 av desse kronene er på plass. Ifølgje Holm har laget framleis ikkje fått svar på fem søknader.- Til no har me berre fått positive svar på søknadene våre. Eg er overtydd om det skal gå fint å få prosjektet fullfinansiert. Dersom det ikkje skjer, manglar det ikkje meir pengar enn at eg trur grendelaget saman med kommunen skal få det til, seier Holm.Byggmeister Kvestad var ikkje til stades på markeringa, men ifølgje Holm har han sagt at i alle fall litt av det gamle bygget framleis kan brukast. - Eg tippar at det meste av materialane må skiftast ut, men arbeidet skal gjerast etter antikvariske prinsipp og det restaurerte bygget skal vera så tett opp til det originale som mogleg, seier ho.Dersom finansieringa går i orden, er håpet at verkstaden skal vera ferdig restaurert før hausten.