Feira 40 år med «Mathilde»
Måndag vart det fest om bord på hardangerjakta som vart starten på noko mykje større enn seg sjølv.
Det opplyser Hardanger fartøyvernsenter i ei pressemelding. Då samla senteret personar som var med heilt frå starten i «Mathilde»-prosjektet, til tur og feiring om bord.
– Det vart ein tur prega av gamle minne, gode historier og skrøner i godt lag med god mat, skriv senteret i pressemeldinga.
Det var i juli 1984 hardangerjakta kom inn Hardangerfjorden bak ein slepebåt. Tidleg om morgonen nådde dei Kaldestad. Båten, som den gongen heitte «Kari Louise» og vart kjøpt på tvangsauksjon, var frøet til det som i dag er eit stort museum og senter for fartøyvern i Norheimsund.
Ein av dei som var med på reisa frå Sandnessjøen til Norheimsund i 1984, Torbjørn Kaarbø, fortalde måndag om den strabasiøse ferda med mellom anna motorproblem og bergingsaksjon undervegs.
– Då me til slutt passerte Ølve, måtte me ta ein ekstra sving framom evja der «Mathilde» vart bygd 100 år tidlegare. Det var ikkje ei sjel på kaien, men me gjorde det til ære for båten, fortel Kaarbø.
Båten vart bygd av Ola Haktorsen Nerhus i 1884. Han vart nytta som seglbåt i klippfiskhandelen. I 1940–1941 fekk doningen motor og vart nytta i fraktfart.
Stiftinga Hardangerjakt vart skipa det året båten kom til Kvam. Starten var prega av idealisme og dugnad. Partsbrev vart selde for å skaffa pengar til å rusta opp båten.
– Eg hugsar Torbjørn hadde ein Land Rover som me køyrde land og strand rundt i for å selja partsbrev. Bilen var heilt utan demping, så at me ikkje rista laus nyrene eller noko anna, er eit under, sa Inger W. Seljestad under feiringa.
