Fann fotoarkiv frå Kvam
I samband med opprusting av fotoarkivet i Vestland fylkeskommune dukka bilete etter fotograf Alfred Vikør (1897–1972) frå Kvam opp.
Det opplyser Hedvig Ølmheim, rådgjevar i avdelinga for kultur og folkehelse i Vestland fylkeskommune. I ein e-post til Kvam herad skriv Ølmheim at korrespondanse knytt til arkivet syner at det tilhøyrer Kvam, og vart lånt ut til Hordaland fylkeskommune med mål om å digitalisera bileta i 2007. No ynskjer rådgjevaren å få avklart kva som er gjort og ikkje. Vart det ferdigstilt og sendt digitale filer tilbake? spør ho.
Opprustinga av det fylkeskommunale fotoarkivet gjev nye klimastyrte fotomagasin og ny publiseringsløysing for digitaliserte foto, skriv Ølmheim, som er open for eit samarbeid med heradet. Heradet kan deponera materialet hjå eller gje det i gåve til fylkeskommunen, og slik sikra seg gratis lagring av det.
Kultursekretær i Kvam herad, Mary Ann Sørheim, seier til HF at ho har sjekka kva som finst i Kvam. Til no har ho berre funne negativar. Så snart ein får kartlagt kva som finst av bilete, skal Kvam herad ta stilling til kva heradet vil gjera med arkivet.
– Me tykkjer det er eit spennande materiale, og er klare til å bistå heradet med rådgjeving eller eit meir omfattande samarbeid, seier Ølmheim.
– Kor stort arkiv er det snakk om?
– Den delen me oppbevarer, er ikkje veldig stor, men så er det òg noko i Kvam. Det vert ein del av kartlegginga å finna ut av det, seier ho.
