Epos bad om tilskot

Pengane skal ifylgje søknaden gå til etablering av det flytande litteraturhuset i 2023. Prosjektet kom i stand etter at stiftinga Fritt Ord gjekk inn med i alt tre millionar kroner i driftsstønad i dei tre fyrste driftsåra. Dagleg leiar Maria Pile Svåsand vart tilsett, og i oktober var båten på sine fyrste oppdrag i samarbeid med Litteratursymposiet i Odda.

Hausten 2022 har stiftinga arbeidd med finansiering av kjøp av M/S «Epos» frå Vinnes Skyssbåtservice AS. Kjøpesummen er 2,5 millionar kroner. Sparebankstiftinga Hardanger har bidrege med 600.000 kroner til eigenkapital.

Ein ventar svar på søknader om bidrag frå fleire stiftingar og organisasjonar, mellom andre stiftinga Grieg Foundation og Vestenfjelske Bykreditts Stiftelse. Resten skal lånast.

– «Epos» har ein 60 år lang tradisjon som bokbåt på Vestlandet, og engasjementet og litteraturgleda er med inn i den nye driftsforma, skriv Svåsand i søknaden.

Stiftinga overtek båten i slutten av 2022, og har som ambisjon å kunna tilsetja ein styrmann i 2023. Også ein motorpassar er påkravd mannskap, noko som gjer at stiftinga vil ha tre tilsette.

– «Epos» er nyleg verna av Riksantikvaren. Grunnlaget er bruken som litteraturbåt og at båten er byggteknisk unik som ein av dei fyrste aluminiumsbåtane i verda, skriv Svåsand.