– Energisk og omfangsrikt

Tankar om natta. Dei som kjem når ein slår opp augelokka ein gong mellom klokka tre og fem. Som utan varsel tek bustad. Som grev seg plass mellom svevn og vaken. Som gror godt av usikra fantasi, skam og irritasjon. Som ikkje gjev seg før eit varmt klede av forsoning legg seg over og gjev nattankane ein veg ut av den maskinkalde gravinga og virrande avmakta.

Skildringa av nattankane kjende truleg fleire seg att i då Sissel Lillebostad ynskte velkomen til dei om lag sytti frammøtte i utstillingssalen. Nattankar kan høyrast mørkt ut, men utstillinga er fylt av fargar.

– Kanskje me skal sjå på dei som mental reingjering, nett slik naturen skiftar ut gamalt og døyande med nytt. Det er berre å gle seg over denne skaparkrafta. Me haustar av henne i dei vakne timane, sa ho.

– Uendeleg mottakelege

Lillebostad er fagleiar i Kunsthuset Kabuso, og presenterte tre erfarne kunstnarar i årets fyrste utstillingar: Marthe Karen Kampen, Gunvor Nervold Antonsen og Magnar Moe.

Moen stilte ut «Tonar i svart» i foajeen. Trønderen – som held til i Bergen – jobbar med teikning. Hovudsakleg kol på papir. Under opninga skildra Lillebostad Moen sine teikningar som eit møte mellom elementa.

– For meg ser det ut som ein dans mellom mørke og lys, flate og riss, og kol og papir. Teikningane gjev rom og flate på same tid, og er uendeleg mottakelege for sansing og tolking.

Ei blomeeng av tre

Hovudutstillinga «Nattankar» er ei dialogutstilling av Kampen og Antonsen. Antonsen nyttar tre, tekstil, tråd, krit, oljemåling og paljettar. Lillebostad meiner verka er energiske og omfangsrike, og nær flaumar over av referansar til symbol og ikoniske verk i kunsthistoria.

Også 55 skulpturar i tre var stilte ut. Både gran, løn, furu, bjørk, ask, poppel og bøk var nytta, og farga med pigment og olje. Unike alle som ein.

Teppa i utstillinga er laga av Kampen. Teppa er meinte som vern. Også der er meiningsberande symbol arbeidde inn.

– Teppa er forbundne med opplevingar i eit familieliv, der heimen blir ein trygg base for innsikt og utforsking. Kampen er oppteken av vona me ber på, sjølv om avmakta trugar, sa Lillebostad.

Utstillinga står til og med 21. april.