Eit par tusen høyrde hardingtonar

Styreleiaren i Hardingtonar fortel at festivalen selde mellom 1.600 og 1.700 billettar. Med dei to opne konsertane – på Bjødnabrakane og Tonesprell med Kvam ungdomsstorband i Grova – er han sikker på at publikumstalet er på over 2.000. Konserten med Vamp i Norheimsund idrettshall var så godt som full, med 600–700 personar i publikum.Alt i alt har besøkstalet vore 15–20 prosent betre enn under fjorårets festival, som var litt dårlegare enn normalen.

Artistane skrytte

Botnen seier han har fått gode tilbakemeldingar frå Vamp, som sa at konserten var eitt av dei verkelege høgdepunkta gruppa har hatt på lenge.– Dei syntest det var veldig kjekt at publikum var lyttande, seier han.Nytt av året var at festivalen delte ut eit talentstipend. 10.000 kroner frå Sparebanken vest vart delte ut til Ingmar Lid.Botnen har vanskar med å trekka fram eitt høgdepunkt.– Eg er klassisk musikar, og har kanskje hjartet mitt aller nærast dei prestasjonane. Men eg vart positivt overraska over fleire av dei andre, seier han.Botnen seier solisten på fiolin under festkonserten med Bergen filharmoniske orkester fredag var ein «høgdare». Han nemner også meisterklassekonserten i Kabuso torsdag.Han lét seg imponera av a capella-nummeret til Vamp, av røystene til songarane i Nordic Voices, og vart underhalden av avslutningskonserten The Alehouse Sessions. Mellom anna.

– Set Kvam på kartet

– Eg har med meg mykje frå festivalen. Me meiner, og me håpar og trur, at folk synest at me leverer høg kvalitet. Me prøver å nå alle aldersgrupper. Me har program for barnehagane, og heilt inn på Toloheimen og Øysteseheimen – der dei eldre ikkje kan komma ut, der kjem me inn. Han meiner festivalen er med og set Kvam på kartet.– Det er viktig. Skjer det noko, er det mykje kjekkare å bu og verka her.Elles skryter han av resten av festivalstyret .– Me har mange som bidreg, og eit veldig godt styre som gjer ein utruleg god jobb. Dei gjer det lett å vera sjef, seier Botnen.