– Ein knallhard jobb, men moro og lærerikt
Laurdag ettermiddag opna dørene til den fyrste, og truleg ikkje den siste, festivalen i Ståvika i Tørvikbygd.
Å arrangera festival er ikkje for pyser. Etter fire døger med lite mat og søvn – og mykje kaffi – kunne Johan Hans Bengt Bruun endeleg senka skuldrene. Han er ein av arrangørane bak festivalen.
Timane før opning var prega av litt stress med å få betalingsterminalar og anna til å prata saman, men det gjekk seg fort til.
Sjå bilete frå festivalen her:
— Fått god hjelp
Då HF trefte på han like etter opning, var han mest av alt glad for det fine vêret. Det var det som hadde uroa arrangørane mest. Ei bye på ettermiddagen vart fort gløymd. Bruun driv konsertarrangørfirmaet Beck Live AS saman med Birthe Augestad Nilsen, og er såleis van med å arrangera konsertar. Men utandørs festival har han ikkje vore med på før.
— Korleis har det gått med førebuingane?
— Førebuingane har gått utruleg bra! Då me stod her og rigga til scena, dukka folk berre opp, seier Bruun.
Han er full av lovord om dei frivillige, om sponsorane og om bygda. Alle har vore like positive og hjelpt til der dei har kunna, fortel han.
— Ingen uventa problem i siste liten?
— Nei. Faktisk ikkje.
Luksustur
Vel 600 billettar var selde før opning. To av dei kjøpte vossingane Knut Lydvo og Elin Ygre Skorve. Dagen før fann nemleg Skorve ut at Luxus Leverpostei, som ho er stor fan av, skulle spela. Dei kasta seg rundt, bestilte hotellovernatting i Øystese og fekk tak i festivalbillett. Skorve tykte konserten deira var nydeleg.
— Det var underhaldning frå a til å, skyt Lydvo inn.
Underhaldning fekk dei tilreisande også før festivalen. Tilfella skulle ha det til at Øystese spela heimekamp mot Voss like ved hotellet dei bur på. Det var ikkje sambuarane klar over. At laget frå Voss i tillegg vann med ni mål, gjorde dagen komplett.
Live i Ståvikjå 2023
Fyrst ut på scena var det lokale bandet Kickstarters. Så spela Malene Markussen og Luxus Leverpostei før Gunslingers, med kvemmingen Frode Måkestad i spissen, avslutta showet. Medan nokre føretrekte leverpostei, var det andre som fyrst kvikna til då det vart snakk om Viagra, biff og bearnéssaus. Stemninga var det uansett ingenting å seia på.
22 vakter og 13 frivillige var på plass for å halda orden. Det gjorde til at ikkje alle festivaldeltakarane fekk med seg alle konsertane, men dei det galdt, hadde truleg hatt det ekstra kjekt før festivalkvelden deira tok slutt.
— Å skipa til festival er knallhard jobb, men det er moro og lærerikt, seier Bruun.
Allereie no kan han seia at «Live i Ståvikjå 2023» er eit faktum.
