– Ein kjempefin dag med nøgde folk

Vêrgudane spela på lag og sola skein då vårmessa, i regi av Jondal Frivilligsentral, vart skipa til i helga. På båe sider av vegen stod smilande kvinner, menn og unge ved standane. Dei som tok turen innom, kunne kjøpa ymse trearbeid, handarbeid, keramikk, betongfigurar, kunst og heimebakst, for å nemna noko.

– Ei miniutgåve

Blant utstillarane var Ida Galtung. Laurdag var fyrste gong 25-åringen frå Jondal deltok på ei messe. Det tykte ho var både skummelt og spanande.

– Når ein viser fram kunsten sin, så viser ein fram den mest sårbare delen av seg. Då er ein ekstra spent på kva respons ein får, seier Galtung.

Ho stilte ut verk i ulike fasongar, storleikar og fargar. Måleteknikkane ho nyttar i arbeidet, varierer mellom gouache, akryl- og vassmåling, fortel Galtung.

25-åringen har eit lite atelier i Blåhuset i sentrum. Der brukar ho så mykje tid som ho kan til å dyrka hobbyen, som ho ein dag vonar vert meir enn berre ein hobby. Draumen er å kunna leva av kunsten, forklarar ho.

– Det eg stiller ut i dag, er ei miniutgåve av det eg ynskjer å få til, seier Galtung.

Sjå fleire bilete frå messa:

– Eit vellukka arrangement

Christine Fauskanger Molven, dagleg leiar i Jondal Frivilligsentral er svært fornøgd når HF snakkar med henne etter at messa er omme.

– Det har vore ein kjempefin dag med mange positive tilbakemeldingar og nøgde folk, både gjester og utstillarar, fortel ho.

I alt 18 utstillarar deltok. Ifylgje Molven hadde nokre av dei selt meir enn dei hadde venta, og fleire skal ha gjeve uttrykk for at dei ynskte å stilla på nytt dersom det vert fleire messer.

Bakgrunnen for arrangementet var ein førespurnad frå nokon som deltok på messa før jol. Messa var den fyrste med frivilligsentralen som arrangør. Det såkalla prøveprosjektet gjekk så bra at sentralen bestemde seg for å prøva igjen, forklarar Molven.

– Fyrst måtte me sjå om me som frivilligsentral ville klara å handtera og organisera noko slikt. Det gjekk bra. Denne gongen var me tidlegare ute med å marknadsføra messa, og det gav resultat, seier den daglege leiaren.

Klare for meir

Ikkje berre jondølingar, men også tilreisande frå Kvam, andre stader i Hardangerfjorden og Gol vitja messa. Dei fleste gjestene kom frå gamle Jondal kommune, ifylgje Molven.

– Vert det fleire messer?

– Ja, så lenge det er interesse for det, dei lokale synest det er moro og næringslivet er med, så vil me gjera dette. Me vil at det skal skje noko kjekt og skapa ein sosial møteplass for dei som bur i gamle Jondal kommune, seier Molven.