— Ein god start på sommaren

— Eg har litt sommarfuglar i magen. Gjestene seier at dei er så glade for at det endeleg skjer noko, seier Borge.

Torsdag gjekk det forholdsvis roleg, men fredag og laurdag har hotellet henta inn det ein maktar av bemanning.

— Då er det full rulle, seier Borge.

•Sjå bileta frå torsdagen her.

— Svoltne på kultur

Terrassen på hotellet er fullbooka av festivalgjester ut helga, men mange rom står ledige. Gjester som har villa tinga rom uavhengig av festivalen, har vorte informert om arrangementet, og nokre har valt ei anna helg. Romma vert i staden marknadsført til gjester som vil få med seg festivalen.

Borge seier at ho ønsker at det skal skje mykje forskjellig på hotellet.

— No har me Bygdalarm, og i oktober har me planar om ei blueshelg. Me håpar på ulike arrangement i eit breitt spekter framover, seier ho.

Det vart nyleg halde standupshow på hotellet. Ho fortel at komikarane nesten vart overvelda av responsen.

— Det var nesten hysterisk latter frå publikum. Folk er så ivrige. Endeleg får dei komma seg ut og oppleva noko. Ein merkar at folk er svoltne på kultur, seier ho.

Passar på smittevern

Ein halvtime før torsdagsprogrammet startar — diktar og komikar Jon Hjørnevik med Dagfinn Iversen på gitar —, er hotellhagen framleis bada i sol. Enn så lenge.

Gjestene sit i eigne grupper og bestiller mat og drikke ved borda.

Borge seier at ein har god dialog med skjenkekontrollen om smittevern.

— Me ønsker å gjera alt etter boka. Kvar gong noko er uklart, har me spurt om råd, seier ho.

Ho slår fast at den første festivaldagen er kjempekjekk.

— Eg gler meg til ei spanande helg. Det er ein god start på sommaren, seier ho.